काठमाडौं । स्पेनिस क्लब रियल मड्रिडको ४० खेलको अपराजित यात्रामा पूर्णविराम लागेको छ ।
स्पेनिश ला लिगा अन्तर्गत आइतबार राति भएको खेलमा रियल मड्रिड सेभिल्लासँग २–१ ले पराजित भयो ।
सेभिल्लाको घरेलु मैदानमा भएको खेलमा रियलले ६७ औं मिनेटमा क्रिष्टियानो रोनाल्डोको पेनाल्टी गोलमार्फत अग्रता लिएको थियो ।
तर, ८५ औं मिनेटमा कप्तान सर्जिओ रामोसले आत्मघाती गोल गरेपछि खेल १–१ गोलको बराबरीमा पुगेको थियो । खेलको अतिरिक्त समयमा जोभेटिकले गोल गरेपछि सेभिल्ला विजयी भयो ।
यो रियल मड्रिडको ६ अप्रिलपछि पहिलो हार हो । हारका बाबजुद रियल ला लिगाको शीर्ष स्थानमा कायम छ । सेभिल्ला भने बार्सिलोनालाई पछि पार्दै दोस्रो स्थानमा उक्लिएको छ ।
रियलको १७ खेलबाट ४० अंक छ भने सेभिल्लाको १८ खेलबाट ३९ र समान खेलबाट बार्सिलोनाको ३८ अंक छ ।
