काठमाडौं । इग्लिस प्रिमियर लिग फुटबलमा उपाधीको दाबेदार लिभरपुल स्वान्सी सिटीसँग स्तब्ध बनेको छ ।
शनिबारराति भएको खेलमा लिभरपुल सिटीसँग आफ्नै घरेलु मैदान एलफिल्डमा ३–२ ले पराजित भएको हो ।
खेलमा स्वान्सी सिटीलाई विजयी गराउन फर्नान्डो लोरेन्तेले दुई गोल गरे भने जिल्फी सिगुर्डसनले एक गोल गरे । लिभरपुलका रोबर्टो फिर्मिनोले दुई गोल गरेपनि जितका लागि पर्याप्त भएन ।
शनिबारराति नै भएको अर्को खेलमा म्यान्चेस्टर सिटी र स्टोक सिटीले १–१ गोलको बराबरी खेलेका छन् । खेलमा युनाईटेडका हुँवा माटाले १९ औं मिनेटमा नै आत्मघाती गोल गरेपनि युनाईटेड १–० ले पछि परेको थियो । सोही गोल फर्काउन उसलाई खेलको अतिरित्त समयसम्म कुर्नुपर्यो ।
माटाको स्थानमा मैदान प्रवेश गरेका वायन रोनीले ९० औं मिनेटमा एक गोल फर्काउदै खेल बराबरी गरेका हुन् । यो गोलसँगै रोनी म्यान्चेस्टर युनाईटेडका सर्वाधिक गोलकर्ता बनेका छन् । उनले ४४ वर्षअघिको सर बबी चार्लटनको कीर्तिमान भंग गरेका हुन् ।
प्रिमियर लिग अन्तर्गतकै अर्को खेलमा म्यान्चेस्टर सिटी र टोटनह्याम हट्सपरले २–२ गोलको बराबरी खेल्दै अंक बाँडेका छन् ।
खेलमा सिटीका लेरोए साने र केभिन डे ब्रायनले एक एक गोल गरेपछि टोटनह्याम २–० ले पछि परेको थियो । तर लण्डन क्लबका लागि डेले अली र हिउङ मिन सनले एक एक गोल फर्काएपछि खेल बराबरीमा सकिएको हो ।
प्रिमियर लिग अन्तर्गतका अन्य खेलहरुमा एभर्टनले क्रिष्टल प्यालेसलाई १–० ले हरायो भने वेष्ट ह्याम युनाईटेडले मिडिल्सब्रोलाई ३–१ ले पराजित गर्यो ।
यसैगरी वेष्ट ब्रोमले सण्डरल्याण्डलाई २–० ले हराँउदा बर्नमाउथ र वाट्फोर्डले २–२ गोलको बराबरी खेलेका छन् ।
प्रिमियर लिग फुटबलमा आइतबारराति तीन खेल हुनेछन् । साउथह्याम्पटनले गत सिजनको विजेता र लेष्टर सिटीसँग खेल्दा आर्सनल र बर्नली तथा चेल्सी र हल सिटी आमने सामुने हुनेछन् ।
शीर्ष स्थानमा रहेको चेल्सीले २१ खेलबाट ५२ अंक जोडेको छ भने दोस्रो स्थानमा रहेको टोटनह्यामको २२ खेलबाट ४६, तेस्रो स्थानमा रहेको लिभरपुलको समान खेलबाट ४५ अंक रहेको छ ।
