काठमाडौँ– देशको चिकित्सा शिक्षा सुधारका लागि जनविरोधी विधेयक नल्याउन माग गर्दै दूरदराजको जुम्लामा २० दिनसम्म आमरण अनशनमा रहेका डा. गोविन्द केसीलाई अपहरणकारी अभिभावक सरकारले काठमाडौंमा ल्याएर अलपत्र पारेको छ । लामो अनसनका कारण कमजोर अवस्थामा रहेका केसीलाई जबर्जस्त सेनापुलिस परिचालन गरी उठाएर काठमाडौंमा ल्याए पछि उनलाई हाल वेवास्ता गरिएको छ । केसीलाई २०औं दिनमा कर्णाली स्वास्थ्य विज्ञान प्रतिस्ठानबाट सेनाको हेलिकोप्टरमा हाली काठमाडौँ ल्याइएको थियो ।
केसीको आत्म स्वीकृतिबिना अपहरण गरेर काठमाडौंमा ल्याएपछि पनि सरकारी पक्षले प्रतिनिधिसभामा दर्ता भएको चिकित्सा शिक्षा विधेयक फिर्ता लिएर वार्ताको वातावरण तयार पार्ने काम गरेको छैन । त्यसैले वार्ताका लागि वार्ता गर्न पठाएको सरकारी मानिसहरुलाई केसीले अनाधिकारिक भन्दै अधिकारसहितको वार्ता टोली आएर उनीसँग सम्वाद थाल्न माग गरेका छन् ।
सरकारले शिक्षा मन्त्रालयका सचिव खगराज बरालको संयोजकत्वमा तीन सदस्यीय वार्ता टोली गठन गरेको छ । केसीको प्रमुख मागमा १० वर्षसम्म काठमाडौँ उपत्यकामा नयाँ मेडिकल कलेजको सम्बन्धन नदिने प्रावधान रहनुपर्ने कुरामा जोड रहेको छ । उनका अनुसार बरु दूरदराजका इलामा मेडिकल कलेजहरु खोलिनुपर्ने रहेको छ । हाल डा. केसी महाराजगञ्जस्थित त्रि.वि. शिक्षण अस्पतालमा अनसनरत छन् ।
अनसनरत केसीलाई काठमाडौँ ल्याएपछि वार्ता गर्न सहज हुने बताउँदै आएको सरकार आफ्नो पूर्ववत् अडानमा टसको मस छैन । केसीसँग दुईदुई पटक वार्ता गरिसकिएको भन्दै जनतालाई भ्रममा पारिरहेको छ । केसीको नजिकै गएर सञ्चो या विसञ्चोका कुरा गरेर सरकारी वार्ता टोलीले ढाँटढुँट गरिरहेको छ ।
यता केसीको भने सरकारी कर्मचारीसँग वार्ता नगर्ने र मन्त्रीस्तरीय वार्ता टोली गठन भएमा संवाद अघि बढाउने सोच रहेको छ । तर प्रम ओलीको सचिवालयले केसीको माग पुरानो भैसकेको भन्दै नयाँ रटान रट्न थालेको छ । यसबाट संवाद र सहमतिको कुनै संकेत पनि देखिएको छैन ।
