सत्तालाई स्वस्ति गरिरहेको कवि !

सत्तालाई स्वस्ति गरिरहेको कवि !

शनिबारीय साहित्य : कविता

****

 

जतिसुकै वाचाल होस

होस जतिसुकै चर्चित

जतिसुकै लोकप्रिय होस

होस जतिसुक‌ै ह्याण्डसम/ ब्युटिफूल

सत्तालाई स्वस्ति गरिरहेको कवि

मात्र एउटा बुख्याँचा हो

सत्ताले सत्ता रुँघ्न ठड्याएको

एउटा निरिह गोठालो हो ।

सत्तालाई स्वस्ति गरिरहेको कवि

झट्ट हेर्दा जतिसुकै भद्र देखियोस

ऊ भित्रबाट अभद्र हुन्छ

जतिसुकै सर्वगुण सम्पन्न देखियोस

ऊ भित्रबाट रित्तो र खोक्रो हुन्छ

जतिसुकै नैतिकताका गफ गरोस

पहिलो दृष्टिमै अनैतिक हुन्छ ।

मञ्चहरूमा दैनिक

खादा र मालामा भए पनि ऊ

उसलाई मालाहरूले जिस्काइरहेका हुन्छन्

मालाहरू स्वयम् हिनतावोधमा हुन्छन्

मालाहरू सोच्छन्-

यस अनैतिकको गलामा झुण्डिनु

र भुस्याहा कुकुरको गलामा झुण्डिनु

कुन चै तैबिसेक होला ?

मालाहरू स्वयम् अलमलिन्छन ।

अखवारका रङ्गिन पानाहरूमा

अनलाइनका तिरिमिरी पानाहरूमा

या विद्यार्थीका पुस्तकहरूमा

प्राय स्वस्तिवाचकहरूकै कविता हुन्छन्

सत्ताले सत्तकालागि

महानायक बनाएर प्रस्तुत गरे पनि

असलमा तिनीहरू बुख्याँचा नै हुन्छन ।

जतिसुकै

हाँ हाँ हुँ हुँ

र फाँ फाँ फुँ फुँ गरे पनि

स्वस्तिवाचकहरू

कहिलै स्वाभिमानको सिर उठाउदैनन्

स्वस्ति वाचनमा झुक्दा झुक्दा

ती उमेरमै कुप्री परेका हुन्छन ।

संसारमा

थुप्रै कुरुप कुराहरू हुन्छन

तीमध्ये अग्रपङ्तीमा पर्छन

सत्ताद्वारा पालित, पोषित र प्रशिक्षित

सत्तालाई स्वस्ति गरिरहेका कविहरू !

***

२०८१ जेठ ३०

सिनामंगल