इश्वरीप्रसाद गैरे/दाङ

८, पुस/ नेपाल कम्युनिस्ट पार्टी (क्रान्तिकारी माओवादी) निकट अखिल (क्रान्तिकारी) दाङ जिल्लाको दोस्रो जिल्ला भेला हिजो विहिबार घोराहीमा सम्पन्न भएको छ ।

हार्दिक शुभकामना !

भेला अखिल क्रान्तिकारीका केन्द्रीय सचिव तथा लुम्विनी प्रदेश संयोजक महेश श्रेष्ठको प्रमुख आतिथ्यतामा भएको थियो । सो भेलालाई सम्बोधन गर्दै केन्द्रीय सचिव महेश श्रेष्ठले ‘नेपालको शिक्षा बेरोजगार उत्पादन गर्ने भट्टीमा रूपान्तरण भएकोले शिक्षित युवतीयुवाहरू दैनिक अन्तर्राष्ट्रिय बिमानस्थलबाट बाहिरिन बाध्य रहेको’ बताए । उनले वर्तमान शिक्षा जनताको पहुँचमा नभएको र दलालहरूको मुठ्ठीभित्र रहेकाले यो अवस्था सिर्जना भएको बताउँदै त्यसको अन्त्य गर्न आमुल परिवर्तनका लागि देशका सम्पूर्ण उत्पीडित वर्गका विद्यार्थी युवाहरू सङ्घर्षमा लाग्नुपर्ने बताए । श्रेष्ठले सुन्दर भविष्य निर्माण गर्न अहम भुमिका निर्वाह गर्नुपर्ने ऐतिहासिक जिम्मेवारी यस जिल्ला कार्य समितिलाई पनि आएको धारणा प्रस्तुत गरे ।

जिल्ला भेलालाई सम्बोधन गर्दै नेपाल कम्युनिस्ट पार्टी (क्रान्तिकारी माओवादी)का केन्द्रीय सदस्य तथा दाङ जिल्ला इञ्चार्ज समिरले वर्तमान राजनीतिक अवस्थाका बारेमा चर्चा गर्दै नेपाली विद्यार्थीले अझैसम्म पनि सर्वसुलभ शिक्षा नपाएको, शिक्षामा दलालीकरण भएको, शिक्षा सामान्य नागरिकको पहुँचमा नभएकोले तत्काल व्यवहारिक, वैज्ञानिक, जिवन उपयोगी शिक्षा लागू गराउन विद्यार्थी आन्दोलन उठाउनुपर्ने र त्यसको नेतृत्व अखिल (क्रान्तिकारी)ले गर्नुपर्ने विचार व्यक्त गरे ।

भेलाले सङ्गम केसीको अध्यक्षतामा २५ सदस्यीय जिल्ला कार्य समिति गठन गरेको छ । जसको उपाध्यक्षमा कमल वली, सचिवमा मुना पुन, कोषाध्यक्ष शिशिर चौधरी, सहसचिव कामना वली रहेका छन् । त्यसैगरी सदस्यहरूमा गीता आचार्य, सुनिता पौडेल, नरेश विक, सीमा विक, भरत विक, ममता शर्मा गैरे, टीका शर्मा, बिनिता चन्द, यमुना केसी, लक्ष्मी विक, गोमा क्षेत्री, निमराज गौतम, दीपा सुनार, सरिता विक, प्रेयङ्का कुँवर र साबित्रा रकाल रहेका छन् ।

सङ्गम केसीको स्वागत मन्तव्यबाट सुरु भएको कार्यक्रममा नवनिर्बाचित कार्यसमितिलाई बधाई तथा शुभकामना दिँदै देशभक्त जनगणतान्त्रिक मोर्चा नेपाल लुम्बिनी प्रदेश उपाध्यक्ष तथा दाङ जिल्ला अध्यक्ष ईश्वरीप्रसाद गैरेले विद्यालय तथा जिल्ला स्तरमा शैक्षिक सुधारका लागि महत्वपूर्ण भुमिका खेल्न र त्यसका लागि गरिने सकारात्मक कामको नेतृत्व यही कार्य समितिले गर्न सकोस् भन्दै बधाई तथा शुभकामना दिएका थिए । कार्यक्रम सञ्चालन लक्ष्मी विकले गरेकी थिइन् भने भेलाको अध्यक्षता निवर्तमान जिल्ला अध्यक्ष मनोज थापाले गरेका थिए ।

 

प्रतिक्रिया

सम्बन्धित खवर