काठमाडौं । नेकपा (क्रान्तिकारी माओवादी)ले निर्वाचन बहिस्कार गर्ने घोषित कार्यनीति अन्तर्गत देशैभर गरिरहेको निर्वाचन बहिस्कार कार्यक्रममाथि हस्तक्षेप र धरपकडका घटनाहरु बढेपछि यी घटनाहरु निर्वाचन परस्त संसदवादी पार्टीहरुको दबाबमा भएको ठहर गर्दै निर्वाचन बहिस्कारका शान्तिपूर्ण कार्यक्रममाथिको विभेदकारी धरपकड नरोके चुनावपरस्त शक्तिका विरुद्ध प्रतिरोध संघर्षमा उत्रने चेतावनी दिएको छ । कलंकीको कोणसभामाथि प्रहरीले गरेको हस्तक्षेप र धरपकडको घोर भत्र्सना र निन्दा गर्दै नेकपा (क्रान्तिकारी माओवादी)का प्रदेश ३ का सेक्रेटरी प्रवेशले जारी गरेको प्रेस वक्तव्यमा यस्तो चेतावनी दिइएको हो ।
वक्तव्यमा भनिएको छ, “प्रतिक्रियावादी सरकारद्वारा मञ्चन गरिएको प्रादेशिक तथा संघीय निर्वाचन बहिस्कारको घोषित पार्टी कार्यनीति प्रभावकारी बन्दै गइरहेको छ । यसै सन्दर्भमा चुनाव बहिस्कार कार्यनीतिको बारे जनतालाई सुसूचित गर्दै बहिस्कार आन्दोलनमा सहयोग, समर्थन र सहभागिताको निम्ति आज कलंकी चोक (काठमाडौं) मा आयोजित कोणसभाको क्रममा हाम्रो पार्टीका केन्द्रीय सदस्य तथा काठमाडौं जिल्ला इन्चार्ज शारदा महत, नेवाः मोर्चामा केन्द्रीय उपाध्यक्ष र महासचिव गोर्की श्रैष्ठ र शिव श्रेष्ठ, तामाङ मोर्चाका महासचिव सुरेश तामाङ, महिला नेतृहरु सपना राजथला, कमला चन्द र कोणसभामा सहभागी सर्वसाधारणहरु रविन भट्ट र नितेश जोशी लगायत ८ जनालाई गिरफ्तार गर्नुका साथै कोणसभामा प्रयोग गरिएको साउन्ड सिस्टम, पर्चा, व्यानर पनि खोसिएको छ । शान्तिपूर्ण सभामा गरिउको यस प्रकारको फासिवादी दमन र धरपकडप्रति हाम्रो पार्टी घोर निन्दा र भत्र्सना गर्दछ ।”
वक्तव्यमा शान्तिपूर्ण सभा÷जुलुस गर्न र जनतालाई सुसूचित गर्न पाउने राजनैतिक तथा लोकतान्त्रिक अधिकारको सम्मानसहित नेपाली जनताको बलिदानी संघर्षबाट प्राप्त वाक् स्वतन्त्रता विरोधी हरकत तुरुन्त रोकी गिरफ्तार गरिएका नेता कार्यकर्ता र जनसर्वसाधारणलाई विना शर्त रिहा गर्न माग गरिएको छ ।
