बाढीका कारण भियतनाममा १३ को मृत्यु

बाढीका कारण भियतनाममा १३ को मृत्यु

एजेन्सी । भियतनाममा आएको वर्षा र त्यसपछि आएको बाढीका कारण कम्तीमा १३ जनाको मृत्यु भएको छ ।

भियतनामको प्राकृतिक प्रकोप नियन्त्रण समितिले दिएको जानकारी अनुसार देशको मध्य भूभागमा आएको बाढीका कारण ठूलो भौतिक क्षति पुगेको छ । मध्य भियतनामका पाँच ओटा प्रान्तमा बाढीले १४ जना व्यक्तिलाई बगाएर लगेको र तीमध्ये १३ जनाको शव भेटिएको तथा एकजना अझै बेपत्ता रहेको समितिले जनाएको छ ।

बाढीले करिब १२ हजार हेक्टर क्षेत्रफलमा लगाइएको धानबाली डुबाएको छ । त्यसैगरी करिब एक लाख ६३ हजार थान पशुपंक्षी बगाएको छ ।

समितिका अनुसार बाढीबाट करिब १२८ किलोमिटर सडकका साथै सिंचाई प्रणालीमा पनि क्षति पुगेको छ । भियतनाममा यसवर्ष आएको बाढी, पहिरो, भारी वर्षा तथा आँधीका कारण कम्तीमा एकसय ८९ जनाको ज्यान गइसकेको छ ।

भियतनामको कृषि तथा ग्रामीण विकास मन्त्रालयका अनुसार यस वर्षको ११ महिनामा प्राकृतिक प्रकोपका कारण करिब ३९ करोड १३ लाख अमेरिकी डलर बराबरको भौतिक सम्पत्तिमा क्षति पुगेको छ ।