पोखरा। काठमाडौंमा दलाल पुँजीवादमा आधारित वर्तमान प्रतिक्रियावादी संसदीय राज्यसत्ता स्वार्थका लागि एमाले, माके र नयाँ शक्तिबीच कथित बाम गठबन्धनको उद्घोष भइरहेको बेला पोखरामा जारी नेकपा (क्रान्तिकारी माओवादी)को राष्ट्रिय सम्मेलनमा सच्चा कम्युनिष्ट क्रान्तिकारीहरु बीचको एकताको बहसले महत्वपूर्ण स्थान पाएको छ । आइतबारबाट सुरु क्रान्तिकारी माओवादीको राष्ट्रिय सम्मेलनमा विभिन्न समूहमा छरिएर रहेका क्रान्तिकारीहरुलाई गोलबन्द गरी मुलुकमा वैकल्पिक शक्ति निर्माण गर्ने उद्देश्यले एकताको कोर्स अगाडि बढाउनु पर्नेमा नेताहरुले जोड दिएका छन् । आइतबार सम्मेलनको उद्घाटन सत्रमा क्रान्तिकारी माओवादीका अध्यक्ष मोहन वैैद्य‘किरण’ले सम्बोधन गर्दै मोहन विक्रम सिंह नेतृत्वको नेकपा (मसाल), नेत्रविक्रम चन्द‘विप्लव’ नेतृत्वको नेपाल कम्युनिष्ट पार्टी र ऋषि कट्टेल नेतृत्वको नेकपासँग दुवै तर्फबाट पार्टी एकताको विषयमा अनौपचारिक रुपमा छलफल चलिरहेको बताएपछि क्रान्तिकारी माओवादीका नेता कार्यकर्ताहरुले पनि एकताको विषयमा छलफल बहस गर्न थालेका छन् ।
आइतबार सम्पन्न उद्घाटन सत्रमा नेपाल कम्युनिष्ट पार्टीका स्थायी समिति सदस्य हेमन्त प्रकाश वली‘सुदर्शन’ले क्रान्तिकारी माओवादी र नेकपाबीच चाँडोभन्दा चाँडो आधारभूत रुपमा मिलेका विषयहरुबाट एकताको कोर्सलाई अगाडि बढाउनुपर्नेमा जोड दिएका थिए । पार्टी महासचिव विप्लवको उद्धृत गर्दै उनले मुलुकमा वाम गठबन्धन र दक्षिणपन्थी गठबन्धनका नाममा बढ्दो प्रतिक्रियावादीहरुको ध्रुवीकरणले थपेको चुनौतीको सामना गर्न सच्चा क्रान्तिकारीहरुबीचको एकतामा जोड दिए । त्यसैगरी नेकपाका अध्यक्ष ऋषि कट्टेलले पनि नयाँ जनवादी क्रान्तिका पक्षधर क्रान्तिकारी शक्तिहरुले एकताको कोर्सलाई अगाडि बढाउन ढिलो गर्न नहुने विचार व्यक्त गरे । यता नेकपा (मसाल)का केस पुरी र मसालका महामन्त्री मोहन विक्रम सिंहले पठाएको शुभकामना सन्देशमा पनि एकतामा जोड दिएका छन् ।
प्राप्त समाचार अनुसार पोखरामै जारी विप्लव नेतृत्वको नेकपाको जारी केन्द्रीय समितिको बैठकले पनि एकताको कोर्सलाई अगाडि बढाउने विषयमा छलफल गरिरहेको बुझिएको छ ।
यसैबीच, क्रान्तिकारी माओवादी पार्टीको दोस्रो दिन सोमबार नौ वटा समूह विभाजन गरी सम्मेलनमा प्रस्तुत दस्तावेजमाथि छलफल चलाइएको छ । समूहमा भएका छलफल र त्यसमा सम्मेलनका प्रतिनिधि पर्यवेक्षक लगायत केस र केस सल्लाहकार सदस्यहरु समेतले राखेका मतहरुलाई समूह नेताहरुले मंगलबार विहानबाट प्रस्तुत गरिने एक केन्द्रीय सदस्यले मूलबाटोलाई बताए । उनका अनुसार समूह नेताहरुसँगै पार्टीका सचिवालय सदस्यहरुले पनि मंगलबार नै दस्तावेजमाथिको धारणा प्रस्तुत गर्ने कार्यक्रम तय गरिएको छ । दस्तावेज पारित गरेपछि सम्मेलनले नयाँ केन्द्रीय कार्य समितिको पनि निर्माण गर्नेछ । सम्मेलन बिहीबार सम्ममा सम्पन्न हुने जनाइएको छ ।
