एजेन्सी । अमेरिकी राष्ट्रपति डोनाल्ड ट्रम्पकी छोरी इभान्कालाई ह्वाइट हाउसमा छुट्टै कार्यालय दिइएको छ । उनले अब त्यो कुर्सीबाट आफ्ना बाबुलाई काममा सघाउन र सल्लाह दिने काम गर्नेछिन् । ३५ वर्षकी इभान्काले अब डोनाल्ड ट्रम्पका आँखा र कानको रुपमा काम गर्नेछिन् । तर उनलाई काम गरेवापत ह्वाइट हाउसबाट तलब भने पाउने छैनन् । पूरै संसारमा हाई प्रोफाइल छोरीहरुको सूचीमा एक सफल व्यापारीक घरानाकी इभान्का अब सेलिब्रेटीका रुपमा चिनिएकी छन् । संसारका प्रभावशाली ‘फस्ट डटर्स’ यी हुन् ।

मरियम नवाज शरिफ
४३ वर्षकी मरियम नवाज शरिफ पाकिस्तानी प्रधानमन्त्री नवाज शरिफकी छोरी हुन् । अहिले उनी आफ्नो पारिवारिक समाजसेवी संस्थाको जिम्मेवारीमा छन् ।

उनले २०१३ मा आफ्ना बाबुको सफल चुनावी अभियानमा प्रमुख भूमिका निभाएकी थिइन् ।

उनी पाकिस्तानी सत्ता राजनीतिमा धेरै शक्तिशाली महिलाको रुपमा रहेकी छन् । गत वर्षको पनामा पेपर्समा उनको नाम समेत मुछिएको थियो ।

क्याटरिना टिखोनोभा
रुसी राष्ट्रपति भ्लादिमिर पुटिनका दुई छोरी रहेका छन् । सन् २०१५ मा कान्छी छोरी यकातेरिना त्यसबेला चर्चामा आईन जब थाहा भयो कि उनी मस्कोमा क्याटरिना टिखोनोभाको नामबाट बसेकी छन् । उनी पुटिनकी सल्लाहकारको रुपमा रहेकी छन् । टिखोनोभा रक तथा रोल डान्सर पनि हुन् र उनी सन् २०१३ को विश्व च्याम्पियनसिपमा पाँचौ स्थानमा थिइन् ।

इसाबेल डोस सान्तोष
अंगोलाकी बयोवृद्ध राष्ट्रपति जोस एडुवार्डो डोस सान्तोषकी जेठी छोरी ४३ वर्षीय इसाबेल डोस सान्तोष सरकारी तेल कम्पनी सोनांगोलाकी प्रमुख हुन् । सन् २०१३ मा फोब्र्स पत्रिकाले उनलाई अफ्रिकाकै सबैभन्दा धनी महिलाको रुपमा उल्लेख गरेको थियो । उनको कुल सम्पत्ति ३.२ अरब डलर छ । देशको वित्तबजार, टेलिकम्युनिकेशन र डायमन्ड इन्टस्ट्रीमा उनको साझेदारी रहेको छ ।

सुमेयी एर्दोगान
टर्कीका राष्ट्रपति रिसेप तैयप एर्दोगानकी सबैभन्दा कान्छी छोरी ३१ वर्षीय सुमेयी एर्दोगान आफ्ना बाबुकी विश्वासपात्र हुन् ।

बेलायतमा अध्ययन गरेकी सुमेयी आफ्ना बाबुको सल्लाहकार समेत भइसकेकी छन् र केही राजनीतिक भ्रमणमा आफ्ना बाबुसँगै गएकी छन् ।

उनी आफ्ना बाबु र सरकारको कट्टर समर्थक हुन् ।

ओजोदा रहमान
ताजिकिस्तानकी राष्ट्रपति इमोमाली रहमानकी ३९ वर्षीय छोरी ओजोदा रहमान कानुनकी विद्यार्थी हुन् र सन् २००९ मा उनी उपविदेशमन्त्री बनेकी थिइन् । गत वर्ष उनका बाबुले उनलाई राष्ट्रपति प्रशासनकी प्रमुख बनाएका छन् । उनी सिनेटको सदस्य समेत हुन् ।

मेरिएला क्यास्ट्रो

क्युबाका राष्ट्रपति राउल क्यास्ट्रोकी छोरी मेरियला क्यास्ट्रो संसदकी सदस्य र अल्पसंख्यकको अधिकारका लागि चर्चित व्यक्ति हुन् । उनी सरकारी संस्था नेशनल सेन्टर फर सेक्स एजुकेशनकी प्रमुख हुन् र एड्स रोक्ने र समलैंगिक अधिकारसम्बन्धी नीति बनाउन प्रमुख भूमिका निभाउँदै आएकी छन् ।