एजेन्सी– निकारागुआको सत्तारुढ पार्टी ‘सान्डिनिस्टा नेसनल लिबरेसन फ्रन्ट (एफएसएलएन) गत आईतबार सम्पन्न निर्वाचनमा पुनः विजयी भएको छ ।

देशको सर्वोच्च निर्वाचन परिषद (सिएसई) ले सान्डिनिस्टा पार्टीले ७२.५ प्रतिशत मत पाएर विजयी भएको घोषणा गरेको हो ।

झण्डै १४ हजार मतदान केन्द्रमा ९९.८ प्रतिशत मत खसेको निकारागुवाको निर्वाचन सर्वोच्च परिषद्का प्रमुख आयुक्त रोबर्टो रिभासले जानकारी दिए ।

निकारागुवा ७० बर्षीय राष्ट्रपति डानिएल ओर्टेगाले अघिल्ला कार्यकालहरुमा बलियो आर्थिक अवस्था, बेरोजगारीको न्युनिकरण र गरिबीको अवस्थामा सुधार गरेका थिए । उनका सुधारात्मक कार्यक्रमकै कारण यो पटक जनताले पुनः विजयी गराएको विश्लेशण गरिएको छ ।

उनको व्यापार मैत्री राजनीति र सरकारलाई निरन्तरता दिनका लागि मतदाताहरुले सशक्त जनादेश दिएका छन् । क्युबा, भेनेजुएला, बोलिभियाका र अरु विभिन्न क्षेत्रका नेताहरुले उनलाई बधाई दिँदै फेरि पनि सहकार्य जारी रहने विश्वास व्यक्त गरेका छन् ।

क्युबाका राष्ट्रपति राहुल क्यास्ट्रोले आफ्ना राजदूतमार्फत वधाई सन्देश पठाउँदै निकारागुवा सरकारसँग रहँदै आएको मैत्रीपूर्ण सम्बन्ध थप उचाईमा पुग्ने विश्वास व्यक्त गरेका छन् । निकारागुवामा आइतबार राष्ट्रपति र राष्ट्रियसभाका सांसद चयनका लागि निर्वाचन भएको थियो ।
जसमा लामो समय छापामार युद्ध सञ्चालन गरेको सान्डिनिस्टा पार्टीले लगातार जित निकालेको हो । राष्ट्रपति ओर्टेगा स्वयम् छापामार युद्धको नेतृत्व गरेका नेता हुन् ।