शनिबारीय साहित्य : कविता
धोका
मेरो टोल
आजकल यो देशको
संसदजस्तो भएको छ
रातभरि भुस्याहा कुकुरहरु
भुकिरहन्छन्
र निद्रा
खलबल्याइ रहन्छन्
र, बिहान
टोलको एउटा घर
चोरी भएको
खबरहरु सुनिइरहन्छ ।
०००
राष्ट्रिय कविता महोत्सव
साँच्चै !
त्यो गरिबको भोकको कविता थियो कि
तपाईं अघाउनु भएको डकार
थियो हँ !
वाह !
कविज्यू
तपाईंको कविता
क्या गज्जब !
के अघाएपछि
मानिसहरु भोकको कविता लेख्छन् ?
सोधिहालें ।
०००
सप्ताहन्त
सबैभन्दा सजिलो छ
सहरमा बसेर गाउँको कविता लेख्न
आउनुस !
आउनुस
कविज्यू
गाउँको एउटा–एउटा कविता लेखेर
सिंहदरबारलाई सुनाउन जाऊँ
सिंहदरबारलाई
गाउँको कविताको बास्ना
निकै मन पर्छ ।
०००
