सिरहा । देशभक्त जनगणतान्त्रिक मोर्चा, नेपालको जारी मेची–महाकाली अभियान अन्तर्गत आज सिरहाको भगवानपुर गापा–ठाडी र भारतको लौकाहा मधुवनीमा पर्ने सीमा क्षेत्रमा भारतले मिचेको नेपाली भूभागको अनुगमनपछि सीमा क्षेत्रमै आयोजित कोणसभालाई सम्बोधन गर्दै नेकपा (क्रान्तिकारी माओवादी)का पोलिटव्यूरो सदस्य तथा २ नं. प्रदेश सचिव कृष्णदेव सिंह दनुवारले भारतले मिचेको एक इन्च नेपाली भूमि पनि नछाडिने बताएका छन् । उनले बारम्बारको भारतीय सीमा अतिक्रमण र त्यसमा नेपाली शासकहरुको मौनताले सीमा क्षेत्रका बसोबास नेपाली नागरिकहरु स्वयम् भारतीय हस्तक्षेप र उत्पीडनका विरुद्ध लडिरहेको बताउँदै नेता दनुवारले नेपाली सार्वभौमिकताको रक्षाका लागि सीमानाका जनता जागरुक भइरहेको बताए ।
सीमा क्षेत्रमा बस्ने नेपाली र भारतीयहरु बीचमा रोटी बेटीको सम्बन्ध रहेको भएपनि भारतले सँधै नेपालीहरुमाथि ठूल्दाईको व्यवहार गर्दै आएको छ र सीमा क्षेत्रका नेपालीहरुमाथि अत्याचार गर्ने गरेको आरोप लगाए । उनले भारतले सीमा क्षेत्रमा एकतर्फी रुपमा बाँधेको बाँध, बनाएको पक्की सडकका कारण नेपाली भूभाग डुबानमा पर्ने गरेको र बर्षेनी हजारौ सीमाबासी (मधेसवासी) आफ्नो थातथलोबाट विस्थापित हुनु परेको समेत चर्चा गरे ।
नेपाली भूमि मिचेर सडक, बाँध बनाउने, नेपाली जमिन भएको पुर्जा देखाउँदा पनि नेपालीहरुलाई आफ्नै भूमिमा खेतीपाती गर्न रोक लगाउने, नेपालीहरुमाथि भारतीय सीमा सुरक्षा बलले आतंक मच्चाउने गरेको भन्दै भारतीय हस्तक्षेप र दादागिरीको नेता दनुवारले डटेर विरोध गरे ।
सो कोणसभा तथा सीमा निरीक्षणमा देशभक्त जनगणतान्त्रिक मोर्चा, नेपालका केन्द्रीय अध्यक्ष सीपी गजुरेल, पार्टी स्थायी समिति सदस्य प्रतिकलगायत पार्टी तथा मोर्चाका नेता र कार्यकर्ताहरुको उपस्थिति रहेको थियो । कार्यक्रममा सीमाबासी जनसमुदायको समेत उल्लेख्य उपस्थिति रहेको थियो ।
