काठमाडौं । नेकपा (क्रान्तिकारी माओवादी) निकट अखिल नेपाल क्रान्तिकारी ट्रेड यूनियन महासंघले संगठनको नीति, विधान र अनुशासन विपरीत काम गर्ने दुई नेतालाई कारबाही गरेको छ ।
महासंघको हालै बसेको कार्यालयको बैठकले अखिल नेपाल ट्रेड यूनियन महासंघ तथा अखिल नेपाल क्रान्तिकारी पर्यटन मजदुर संघको नेतृत्व गर्ने ठमानसिंह तामाङ र रामबहादुर बस्नेतलाई महासंघको साधारण सदस्य समेत नरहने गरी निष्काशन गर्ने निर्णय गरेको महासंघका संयोजक इश्वर तिमिल्सिनाद्वारा जारी वक्तव्यमा उल्लेख गरिएको छ ।
साउन २ मा जारी वक्तव्यमा भनिएको छ, “विगत १ वर्षदेखि तत्कालीन पर्यटन संघमा सो संघका दुई तिहाइ सदस्यद्वारा लिखित र मौखिक रुपमा निजहरु विरुद्ध किर्ते हस्ताक्षर गरी संस्थाको कोष दुरुपयोग गरेको, श्रमिक र मालिकहरुका विवादमा व्यक्तिगत लाभ लिएको, छानविनका दौरान कार्यालयका कागजात लुकाई संगठनलाई गुमराहमा राख्ने प्रयत्न गरेको र संगठनको सम्पर्क बाहिर रही संगठन विरोधी गतिविधि गरेको आदि आरोपहरु प्रमाणित हुन आएकोले महासंघको कार्यालय बैठक बसी निजहरुलाई साधारण सदस्य समेत नरहने गरी निष्काशन गर्ने निर्णय गरिएको यसै वक्तव्यमार्फत् जानकारी गराइन्छ ।”
