काठमाडौं । नेपाल कम्युनिस्ट पार्टी (क्रान्तिकारी माओवादी)ले देशैभर २६ औं जनयुद्ध दिवस भव्य रुपमा मनाउने तयारी गरेको छ । सातवटै प्रदेशका अधिकांश जिल्लाहरुमा केन्द्रीत र विकेन्द्रित कार्यक्रमहरुमार्फत् जनयुद्ध दिवस मनाउन लागेको हो ।
प्राप्त जानकारी अनुसार पार्टीको ३ नं. प्रदेशले काठमाडौंमा केन्द्रित कार्यक्रम गर्दैछ । पार्टी प्रदेश सचिव प्रवेशका अनुसार पार्टीले जनयुद्ध दिवस अर्थात् फागुन १ गते काठमाडौंमा युवा मार्चपास गर्ने तयारी गरेको छ । हजारौं युवाहरुको सहभागितामा गरिने युवा मार्चपासलाई पार्टी महासचिव मोहन वैद्य किरणले सम्बोधन गर्नुहुनेछ । १२ बजे शान्तिबाटिका रत्नपार्कबाट सुरु हुने युवा मार्चपास नगर परिक्रममा गरी शान्तिबाटिकामा सभामा परिणत हुने र सभालाई महासचिव किरण लगायतका नेताहरुले सम्बोधन गर्ने कार्यक्रम रहेको छ ।
त्यसैगरी १ नं. प्रदेशका पार्टी इन्चार्ज मीनकुमारले दिएको जानकारी अनुसार बिराटनगरमा प्रदेशस्तरको केन्द्रित जनसभाको तयारी गरिएको छ । पहाडी जिल्लाहरुमा भने जिल्ला स्तरीय कार्यक्रम गर्ने योजना रहेको छ । उदयपुर, सुनसरी, मोरङ र झापाको केन्द्रित सभा विराटनगरमा गर्न लागिएको हो ।
यता २ नं. प्रदेशका इन्चार्ज रमेशका अनुसार धनुषाको जनकपुर, सिरहा, महोत्तरी र रौतहटमा कार्यक्रमको तय गरिएको छ ।
त्यसैगरी कर्णाली प्रदेशका इन्चार्ज चक्रपाणि शर्माका अनुसार प्रदेशका सुर्खेत, दैलेख, रुकुम, जाजरकोट, सल्यान लगायतका जिल्लामा जनयुद्ध दिवस मनाउने तयारी गरिएको छ । रुकुम, सल्यान र जाजरकोटमा संसदीय व्यवस्थाको भण्डाफोर गर्ने खालका कार्टुन प्रदर्शन गरेर जनयुद्ध दिवस मनाउन लागिएको पार्टी केस दिपक शाहीले जानकारी दिनुभयो ।
उता सुदूरपश्चिम प्रदेशका सचिव रामबहादुर महराले दिएको जानकारी अनुसार प्रदेशका ९ वटा जिल्लामध्ये आठवटा जिल्लामा विभिन्न कार्यक्रम गरी जनयुद्ध दिवस मनाउने तयारी गरिएको छ ।
त्यसैगरी ५ नंं प्रदेशको नेपालगञ्ज र भैरहवामा केन्द्रित युवा मार्चपासहित जनसभाको आयोजना गरिएको छ भने प्रदेशका अन्य जिल्लाहरुमा विकेन्द्रित रुपमा विभिन्न कार्यक्रम गरी जनयुद्ध दिवस मनाइदैछ ।
यता ४ नंं प्रदेशको केन्द्रित जनसभा कास्कीको पोखरामा राखिएको छ । यहाँको सभालाई पार्टी पीवीएम चन्द्रहरि सुवेदी अटल लगायतका नेताहरुले सम्बोधन गर्नुहुनेछ ।
