चीनले भन्यो– नेपालको सार्वभौमिकतालाई सँधै सम्मान गरेका छौं, भवन निर्माण गरेको भूमि नेपालले पुनः प्रमाणीकरण गर्न सक्छ’

प्रकाशित मिति : २०७७ आश्विन ७

काठमाडौँ । हुम्लास्थित नेपाल–चीन सीमा क्षेत्रको नेपाली भूभागमा चीनियाँ पक्षले भवन निर्माण गरेको समाचारको विषय काठमाडौंस्थित चिनियाँ दूतावासले मंगलबार राति खण्डन जारी गरेको छ ।
चिनियाँ दूतावासका प्रवक्ता वाङ सीयओलङले आफ्नो आधिकारिक भनाई सार्वजनिक गर्दै चीन–नेपाल सीमा क्षेत्रमा बनेको भवन चीनकै भूभागमा रहेको प्रमाणित भएको दाबी गरेका छन् । ‘नेपाली पक्षले फेरि प्रमाणीकरण गर्न सक्छ,’ प्रवक्ता वाङले भनेका छन् । उनले चीन र नेपाल नजिकको छिमेकी रहेको बताएका छन् । ‘चीनले सधैं नेपालको सार्वभौमिकता र क्षेत्रीय अखण्डतालाई सम्मान गरेको छ,’ उनले भनेका छन् ।
केही दिनयता नेपाली मिडियाले हुम्लास्थित नेपाल–चीन सीमा क्षेत्रमा चिनियाँ पक्षले बनाएको भवन नेपालको नाम्खा गाउँपालिकामा पर्ने समाचार प्रकाशन गरेका थिए । लगत्तै सीमाको वास्तविक रुपमा स्थलगत अध्ययन गर्न हुम्लाका प्रमुख जिल्ला अधिकारी चिरञ्जीवी गिरीको नेतृत्वमा एक टोली गएको थियो ।
उक्त टोलीले स्थलगत अध्ययन गरेपछि केन्द्रमा रिपोर्ट पठाएको छ । तर उक्त सीमा सम्बन्धमा नेपाल सरकारले हालसम्म कुनै प्रक्रिया दिएको छैन । सम्बन्धित मन्त्रालयहरु गृह, परराष्ट्र र भूमि व्यवस्था मन्त्रालयले यस बारेमा केही पनि बोलेका छैनन् ।
चिनियाँ दूतावासका प्रवक्ता वाङले चीन र नेपालको कुनै पनि भूभाग सम्बन्धमा विवाद नभएको उल्लेख गर्दै दुवै पक्षले जहिले पनि सीमा मामिलामा संवाद गर्न सक्ने बताएका छन् ।
यता नेपाल–भारतबीच सीमा समस्यालाई लिएर सम्बन्ध चिसिएको लामै समय भइसक्यो तर हालसम्म त्यसको समाधानका लागि कुनै ठोस पहल हुनसकेको छैन । नेपालले कुटनीतिक माध्यमबाट वार्ताका लागि प्रयास गरेपनि भारतले हालसम्म त्यसको कुनै सुनुवाई गरेको छैन । नयाँ नक्सा जारी भएको चार महिना वितिसक्दा पनि अतिक्रमित भूमि फिर्ताका लागि कुनै पहल गरिएको छैन ।
यसैबीच, बुधबार एक समूहले चीनले नेपाली भूमिमा भवन बनाएको भन्दै चिनियाँ दूताबास अगाडि विरोध प्रदर्शन गरेको छ ।