एजेन्सी– गाम्बियाको राष्ट्रपतिमा निर्वाचित एडम ब्यारोले सेनेगलमा राष्ट्रपति पदको सपथ लिने भएका छन् ।
उनले सामाजकि सञ्जालमा सन्देश लेख्दै सर्वसाधरणलाई सपथ समारोहमा उपस्थित हुन अनुरोध गरेका छन् ।
गाम्बियामा भएको राष्ट्रपतीय निर्वाचनको परिणामलाई अस्वीकार गर्दै वर्तमान राष्ट्रपति यायहा जामेहले राष्ट्रपति पद छाड्न अस्वीकार गरेपछि राजनीतिक संक्रमण चुलिएको हो ।
गत महिना भएको निर्वाचनमा उनी पराजित भएका थिए । उनले निर्वाचनमा निर्वाचन कानुन उल्लंघन भएको आराप लगाउँदै आएका छन् ।
पश्चिम अफ्रिकी सैन्य फोर्स जाम्बियाको सीमामा तैनाथ भएका छन् । उनीहरुले गाम्बियामा सत्ता हस्तान्तरणको लागि दबाब दिने भएका छन् ।
अहिले गाम्बियाको राजधानी सुनसान भएको छ भने सडकहरु खाली भएका छन् । पसल, पेट्रोलपम्प र बैंकहरु बन्द छन् । मानिसहरु अनिश्चित भविष्यका चिन्तामा रहेको सञ्चारमाध्यमहरुले जनाएका छन् ।
त्यहाँका जनताले पश्चिमी अफ्रिकी सैन्य बल छिट्टै देशमा प्रवेश गरी हस्तक्षेप गरोस भन्ने चाहेको बताइएको छ । उनीहरु जामेहको कदम प्रति चिन्तित छन् ।
गाम्बियाका सैनिक प्रमुख उस्मान बड्जेइले अहिले भएको राजनीतिक द्वन्द्वमा सैनिकहरु परिचालन नगर्ने बताएका छन् ।
‘यो राजनीतिक विवाद हो । मैले मेरा सैनिकहरुलाई यो मुर्खतापूर्ण लडाइमा सहभागी गराउँदिन, म मेरा साथीहरुलाई माया गर्छु’, वर्तमान राष्ट्रपति जामेहका नजिक मानिने सैनिक प्रमुख बड्जेईले भने ।
समान जातिय पहिचान र समान भाषी सेनेगल र गाम्बियाका मानिसहरु एकै संस्कृतिका मानिस हुन् । नवनिर्वाचित राष्ट्रपति बरो एक हप्ता देखि सेनेगलमा छन् । उनी अफ्रिकी नेताहरुको सम्मेलनमा सहभागी हुन सेनगल पुगेका हुन् ।
उनी अहिलेसम्म घर फर्किएका छैनन् । उनका ८ वर्षिय छोराको कुकुरको आक्रमणबाट मृत्यु भएको छ । उनले आफ्नो छोराको अन्तिम संस्कारमा समेत सहभागि हुन सकेनन् ।
उनी सेनेगलमा शरणार्थी जीवन विताइरहेका करिब २६ हजार गाम्वियानसँगै छन् । २२ वर्ष अगाडि जामेह सामान्य विद्रोहपछि गाम्वियाको सत्तामा आएका थिए ।
यसैबीच गाम्वियाका उपराष्ट्रपति इसातु जेइ साइडीले पदबाट राजिनामा दिएकी छन् । १९९७ देखि उपराष्ट्रपतिको रुपमा रहँदै आएका उनको राजिनामाले जामेहलाई धक्का लाग्ने बताइएको छ ।