काठमाडौं । आइसीसी विश्व क्रिकेट लिग च्याम्पियनसिपमा नेपालले नेदरल्याण्ड्समाथि महत्वपूर्ण जित निकालेको छ । कप्तान पारस खड्काको कप्तानी इनिङ खेलेसँगै नेपालले नेदरल्याण्ड्समाथि १९ रनको जित निकालेको हो ।
यो जितपछि नेपालले शीर्ष चारमा पर्ने सम्भावना कायमै राखेको छ । यसअघि शनिबार भएको खेलमा नेपालले ७ विकेटको हार बेहोरेको थियो । नेदरल्याण्डको भने यो पहिलो हार हो ।
टस हारेर पहिले ब्याटिङ गरेको नेपालले कप्ताल पारसको ८४ रनको मदतमा २ सय १७ रनको योगफल तयार पारेको थियो । जवाफमा मैदान उत्रिएको घरेलु टोली अन्तिम ९ बल खेल्नु अघि नै १९८ रनमा अलआउट भयो ।
अन्तिम दुई ओभरमा नेदरल्याण्डलाई जितका लागि २३ रन चाहिएको थियो । तर, दोस्रो बलमा सोमपालले विकेट लिए । तेस्रो बलमा मलिक रन आउट भएपछि नेपालले १९ रनको जित हात पारेको छ । यसअघि ४७ औं ओभरको खेलमा नेपालका वसन्त रेग्मीले ३ रन दिएर महत्वपूर्ण दुई विकेट लिएपछि नेदरल्याण्ड्स दबाबमा परेको थियो ।
खराब सुरुवात गरेको उसले आठौं ओभरमा मात्र २१ रन जोड्दा ३ विकेट गुमाइसकेको थियो । मध्यक्रमका ब्याट्सम्यानले पारी सम्हाले । रे भान डेरले ५६ रन बनाए भने गुर्जितर्सले ४४ र ओडाउडले ३५ रन जोडे । यस्तै टी भान डेरले ३६ रन जोडे ।
नेपालका पारससँगै सोमपाल कामी र वसन्त रेग्मीले २–२ विकेट लिए । शक्ति गौचन, सन्दिप लामिछाने र सागर पुनले १–१ विकेट हात पारे ।
नेपालले पनि राम्रो सुरुवात गर्न सकेको थिएन । ६५ रन जोड्दा महत्वपूर्ण ३ विकेट गुमाएको नेपालको पारी कप्तान पारस र सागर पुनले सम्हाले । उनीहरुले चौथो विकेटका लागि ११८ रनको महत्वपूर्ण साझेदारी गरे ।
कप्तान खड्का ८४ रनमा आउट भए भने पुनले ४५ रन जोडे । उपकप्तान ज्ञानेन्द्र मल्लले ३९ रन बनाएका थिए । विनोद भण्डारीले १७ रन बनाए भने अन्य ब्याट्सम्यानले दोहोरो अंक जोड्न सकेनन् ।
घरेलु टोलीका लागि भान मिकेरनले ३ तथा किङ्मा र रिपोनले २–२ विकेट लिए ।
नेदरल्याण्ड्स ८ खेलबाट १२ अंकका साथ शीर्ष स्तानमा छ । दोस्रो स्थनमा रहेको हङकङको ९ र तेस्रो स्थानमा रहेको स्कटल्याण्डको पनि ९ अंक नै छ ।
तर, स्कटल्याण्ड ७ खेल खेलेको छ भने हङकङले ६ खेल मात्र खेलेको छ । पपुवा न्यूगिनीको ८ अंक छ । केन्या र नेपाल समान ६–६ अंक सहित क्रमशः पाँचौ र छैटौं स्थानमा छन् ।
