काठमाडौं । ‘स्वाधीन संयुक्त जनसरकार र जनसंविधानका निम्ति संघर्ष गरौँ !, कठपुतली प्रतिक्रियावादी सरकारद्वारा आयोजित निर्वाचन बहिष्कार गरौँ !!’ भन्ने मूल नारासहित केन्द्रीय संयुक्त संघर्ष समितिले जनमुदायको नाममा एक अपिल जारी गरेको छ । अपिलमा भनिएको छ, ‘यथास्थिति होइन अग्रगामी परिवर्तनतिर देशलाई मोड्न निर्वाचन बहिष्कार आन्दोलन दृढतापूर्वक अगाडि बढाऔं !’
अपिलमा भनिएको छ, “आदरणीय जनसमुदाय,
आज देशमा कठपुतली सरकारले एक थान आम निर्वाचनको नाटक मञ्चन गर्दैछ । के देशमा डढेलोझैँ दन्किरहेका जनताका समस्याको समाधान निर्वाचनले गर्न सक्दछ ? यो प्रश्नको उत्तर खोज्नै पर्ने, एकपटक गम्भीरतापूर्वक घोत्लिनै पर्ने परिस्थिति हाम्रा अगाडि उपस्थित छ । देश र जनताका समस्याको मुहानबारे छलफल नगरी जतिवटा निर्वाचन गरे पनि समस्याको समाधान कदापि हुने छैन ।
पहिलो संविधानसभाको षड्यन्त्रपूर्वक घाँटी रेटेर दोस्रो संविधानसभामार्फत् दलाल पुँजीवादी संसदीय व्यवस्था कायम गर्ने एकथान यथास्थितिवादी संविधान निर्माण गरियो । आज दन्किरहेका ज्वलन्त समस्याहरूको मुहान यही संविधान र व्यवस्थामा खोज्न जरुरी छ । संविधानले भूमिसुधारको मुद्दा नै गायब पारिदियो । असमान सन्धिहरु कायम राख्यो । समुदायलाई शक्तिशाली बनाउनुको सट्टा पुँजीवादी व्यक्तिगत सम्पत्तिको हकलाई बढावा दियो । साम्राज्यवादले लादेको उत्पादन गर्नै नदिने, नागरिकको आधारभूत सेवा क्षेत्रबाट राज्यलाई अलग राख्ने र सम्पूर्ण विषय बजारको हातमा सुम्पने नवउदारवादी नीतिलाई अस्वीकार गरेर राष्ट्रिय स्वाधीन अर्थतन्त्रको पक्षमा संविधान उभिन सकेन । नेपालको मौलिकतामा आधारित बहुसंख्यक उत्पीडित जनताको शासकीय स्वरूप र निर्वाचन प्रणाली तयार पार्न सकेन, बरु दुनियाभरि असफल शासकीय स्वरूप र दलाल पैसावालाको कब्जा हुने निर्वाचन प्रणाली कायम ग¥यो । शिक्षा, स्वास्थ्य बेलगाम व्यापारीकरण गर्ने नीति स्थापित ग¥यो । कर्मचारीतन्त्रदेखि सबै राज्यका निकायहरूलाई पुरानै जनबैरी ढाँचामा निरन्तरता दियो । यिनै आधारभूत विषयहरु आजका समस्याका मुहानहरु हुन् ।
क्रान्तिकारी भूमि सुधार र कृषिको वैज्ञानिकरण नभएपछि बहुसंख्यक किसान उत्साहित भएनन् । कृषि क्षेत्र निरुत्साहित र अलपत्र भयो । देशमा उत्पादन गर्नै नदिने दलाल पुँजीवादी व्यवस्थाका कारण औद्योगिकरणको प्रक्रिया नै रोकियो । अलपत्र कृषि र औद्योगिकरणको अभावले बेरोजगारीको विस्फोट हुन पुग्यो र आज ८० लाखको हाराहारीमा विदेशिनु पर्ने भयावह स्थिति उत्पन्न भएको छ । शिक्षा, स्वास्थ्य, खाद्य सुरक्षा जस्ता विषय बेलगाम बजारको हातमा छाड्नाले महंगी र अभावको कष्टसाध्य अवस्थामा बाँच्न जनतालाई बाध्य पारियो । असमान सन्धिहरू खारेज गर्नुको सट्टा एमसीसी जस्ता घातक सम्झौताहरू लादेर देशलाई थप विदेशीको कठपुतली राष्ट्र बनाउने काम तीव्र पारियो । पुरानै ढर्राको कर्मचारीतन्त्रको निरन्तरता अनि पैसामुखी निर्वाचन प्रणालीले भ्रष्टाचार, कमिसनखोरी, वित्तीय अन्याय र अराजकता व्याप्त हुन पुग्यो । आज दलित, आदिवासी–जनजाति, महिला, मुस्लिम र मधेसीका आधारभूत समस्याहरु जस्ताको तस्तै छन्, केवल ती समुदायका एकाध व्यक्तिलाई सत्ताधारी बनाउने कामबाहेक केही हुन सकेको छैन । यसकारण हामी स्पष्ट हुनै पर्दछ कि समस्या यो दलाल पुँजीवादी संसदीय व्यवस्थामा नै छ र यो व्यवस्था रहेसम्म समस्याहरू बल्झिरहनेछन् ।
यही यथार्थका कारणले नै नेपालका क्रान्तिकारी शक्तिहरूले लगातार यो व्यवस्थाबाट देश अगाडि जान नसक्ने भन्दै व्यवस्था परिवर्तनको संघर्ष अगाडि बढाउँदै आएका हुन् । त्यसैगरी कुशासन र कुव्यवस्थाबाट आक्रान्त भएर परिवर्तनको आकांक्षासहित गत भाद्रमा जेन्जी विद्रोह भयो । तर जेन्जी विद्रोहलाई अपहरण गरी देशी विदेशी शक्तिहरुले देशलाई परिवर्तनतिर लानुको सट्टा पुन यथास्थितिमा नै थन्काउन पुरानो सरकारको स्थानमा एक स्थान त्यस्तै नयाँ सरकार र पुरानो संसदको स्थानमा एक थान उस्तै नयाँ संसद बनाउने प्रपञ्च चलिरहेको छ । यस प्रपञ्चलाई ठाडै खारेज गरिनु आवश्यक छ ।
जब एउटा व्यवस्था असफल भएर जब जनविद्रोह देखापर्छ, त्यसपछि स्वाभाविक रुपमा अग्रगामी परिवर्तनको निम्ति राष्ट्रिय सहमतिसहित नयाँ व्यवस्थामा प्रवेश गर्नै पर्दछ । यो संसारभरिकै आम चलन हो । तर नेपाली जनताको अग्रगामी परिवर्तनको चाहनालाई गुमराहमा पार्न व्यक्ति फेरेपछि समस्या समाधान हुन्छ भन्ने झुट प्रचार गरिँदैछ । यो गम्भीर षड्यन्त्र हो । समस्या व्यवस्थामा छ, त्यसैले त यो व्यवस्थामा जुन पार्टी वा व्यक्ति आए पनि समस्या झन् बढ्दै जाने गरेको छ । तसर्थ, समस्याको समाधान नदिने बरु यथास्थितिलाई दोहो¥याउने निर्वाचनको कुनै औचित्य छैन । चुनाव रोक्नुपर्दछ र अग्रगामी परिवर्तनको निम्ति स्वाधीन जनसरकार र जनसंविधान बनाउने दिशामा अघि बढ्नुपर्दछ । यदि कठपुतली सरकार त्यस विकल्पमा जाँदैन र निर्वाचनको नाटक मञ्चन गर्न तम्सिन्छ भने जनताले निर्वाचन बहिष्कार गर्नुको विकल्प हुन्न । आउनुस्, यथास्थिति होइन अग्रगामी परिवर्तनतिर देशलाई मोड्न निर्वाचन बहिष्कार आन्दोलन दृढतापूर्वक अगाडि बढाऔं !
सम्बद्ध पार्टीहरु ः
क्रान्तिकारी कम्युनिस्ट पार्टी नेपाल, नेपाल कम्युनिस्ट पार्टी (बहुमत), वैज्ञानिक समाजवादी कम्युनिस्ट पार्टी नेपाल, नेपाल कम्युनिस्ट पार्टी, नेपाल कम्युनिस्ट पार्टी (जनपक्ष)
मिति : २० माघ २०८२
