फाटेका कपडा यहाँ जति सुकै धोई सुकाए पनि
आँखा छल्न भनेर अङ्ग करले छोपे लुकाए पनि
यादै कत्ति नराखँदा गहकको खुस्की सकेको दसी
नाङ्गो बस्नु सिवाय के छ यसरी बाटो बिराएपछि ।
जालो पो छ कि झारपातहरूको माटो पुरेको छ कि ?
कस्ता दुश्मन छन् यतातिर कुनै बाटो कुरेको छ कि ?
कस्तो मौसम चल्छ याद नगरी खुट्टा छिराएपछि
हात्ती खाडलभित्र खस्छ विचरो बाटो बिराएपछि ।
खुल्ला झ्याल थियो पस्यो रुमलिंदै त्यो झ्याल बन्दै भयो
देख्यो माउसुली भयो थरहरी इन्तु न चिन्तु भयो
बत्ती बल्छ जता उतै छ थुतुनो हेर्दै छ आँखा धसी
प्राणोत्सर्ग गरेर मर्छ पुतली बाटो बिराएपछि ।
भोको पेट छ खान भक्ष गँगटा हेरेर बस्छन् यता
कुल्ची गज–गज त्यो हिलो वरिपरि घुम्छन् बकुल्ला उता
निक्ली हाल्न तुरुन्त आँट नहुँदा दोधार भित्रै फँसी
अन्धो साँप घुमिरहन्छ जलमा बाटो बिराएपछि ।
पानीको दहमा डुबाई थुतुनो गोही घुमेको छ कि ?
निल्नै खाँतिर ऊ अजिङ्गर बनी आइपुगेको छ कि ?
तैरेको तटमा सिनो नजरले देखी झकाएपछि
छट्टु स्याल भुतुक्क हुन्छ विचरो बाटो बिराएपछि ।
हाली सन्दुसभित्र बन्द गठरी गोली र गट्ठा सबै
फाली बन्दुकलाई मात्र मुखले गर्दा हुुँदी ताण्डवै
छोडी जङ्गललाई त्योे महलको दैलो उघारेपछि
के मथ्र्यो नरघाति बाघ यसरी बाटो बिराएपछि ।
त्यागी उत्तरतर्फ दक्षिण दिशा पक्रेर जाने भए
गोही साथ लिई उतै बहकँदै पानी बहे झैं बहे
रातो रक्तिम जोसिलो चहकिलो झण्डा गिराएपछि
मुक्तिक्षेत्र कहाँ पुगिन्छ यसरी बाटो बिराएपछि ।
(इच्छुक अङ्क ४ बाट ।)
