डब्लुएचओले दियो कोभिड भेरियन्टको नाम

नेपालमा देखिएको भेरियन्टको नाम ‘डेल्टा’

प्रकाशित मिति : २०७८ जेष्ठ १८

पहिलोपटक पहिचान भएको देशको नामको आधारमा राखिने गरेको कोभिड– १९ को भेरियन्टको नामबारे विवाद हुन थालेपछि विश्व स्वास्थ्य संगठनले कोभिड भाइरसको नयाँ भेरियन्टको नामकरण गरेको छ । डब्लुएचओले भेरियन्ट अफ कन्सर्नभित्र परेका भेरियन्टलाई ग्रिक अल्फाबेटको आधारमा नाम दिएको हो ।
विश्व स्वास्थ्य संगठनले बेलायतमा भेटिएको भेरियन्टलाई ‘अल्फा’, ब्राजिलमा भेटिएको भेरियन्टलाई ‘गामा’, दक्षिण अफ्रिकामा भेटिएको भेरियन्टलाई ‘बेटा’, भारतमा भेटिएको भेरियन्ट ( बी १.६१७.२) लाई ‘डेल्टा’ नाम दिएको छ । भारतमै फेला परेको अर्को भेरियन्ट ( बी– १.६१७.१ ) लाई ‘कप्पा’ नाम दिइएको छ ।
नेपालमा पनि पछिल्लो समयमा पुष्टि भएका बी– १.६१७.२ र बी– १.६१७.१ भेरियन्टलाई भारतीय भेरियन्ट भन्न थालिएपछि भारतले आपत्ति जनाएको थियो । भारतको सञ्चार मन्त्रालयले ‘भारतीय भेरियन्ट’ लेखिएका सबै पोस्ट हटाउन सामाजिक सञ्जाल कम्पनीलाई निर्देशन नै दिएको थियो ।
बी– १.६१७.२ नेपालमा देखिएको पछिल्लो भेरियन्ट हो । जिन सिक्वेन्सिङ गर्दा यो भाइरस निकै संक्रामक रहेको पाइएको छ । बी– १.६१७.२ लाई विश्व स्वास्थ्य संगठनले १० मेमा भेरियन्ट अफ कन्सर्न अर्थात् घातक भाइरसको सूचीमा राखेको थियो । अन्य भेरियन्टलाई पनि ग्रिक अल्फाबेटको आधारमा क्रमश: नाम दिइने बताइएको छ ।
भेरियन्टहरूको नाम ग्रिक वर्णमालाको आधारमा धेरै विचार–विमर्श गरेर मात्र राखिएको डब्लुएचओले बताएको छ । ठाउँको आधारमा नाम दिँदा सम्बन्धित क्षेत्रलाई असर पर्ने भएकोले ग्रिक वर्णमालाबाट छानिएको हो । जस्तै, इबोला भाइरसको नाम कंगोलिस नदीको नामबाट राखिएको थियो ।
स्पेनिस फ्लुको उदगमस्थल अहिलेसम्म पत्ता लागेको छैन । तर, भाइरसको नाम स्पेनको नामबाट राखिँदा देशको प्रतिष्ठामा असर पुगेको भन्दै अहिलेसम्म पनि विवाद हुने गरेको छ । त्यसैले भाइरसको नामका लागि विकल्प खोजिएको हो– डब्लुएचओले भनेको छ ।