काठमाडौं । गत वर्ष वैशाख १२ गते गोरखा केन्द्र भएको विनाशकारी भूकम्पपछि बैशाख २९ गतेको शक्तिशाली परकम्पले दिएको पीडामाथि सिन्धुपाल्चोकवासीलाई भोटेकोशीले अर्को पीडा थपिदियो । भूकम्प जानुअघि सिन्धुपाल्चोकको जुरेमा गएको पहिरोले विपद् निम्त्याएपछि सिन्धुपाल्चोकवासीलाई प्रकृतिले एकपछि अर्को गरी पीडा थपिरहेको छ ।
भूकम्पले थलिएका सिन्धुपाल्चोकवासीलाई मंगलबार राती भोटेकोशीमा आएको भीषण बाढीले भोटेकोशी छेउछाउका बस्तीहरुलाई बगायो ।
अहिले फेरि भोटेकोशीमा अकस्मात आएको बाढी र विभिन्न ठाउँको पहिरोले जिल्लाबासीमा अर्को विपत आइलागेको छ ।
भोटेकोशीमा आएको बाढीले सिन्धुपाल्चोकको तातोपानी गाविसका दुई दर्जन बढी घरमा क्षति पुर्याएको जिल्ला प्रशासन कार्यालय सिन्धुपाल्चोकले जनाएको छ ।
भोटेकोशीमा आएको बढीले कटान गर्दा जिल्लाको बाह्रबिसेभन्दा माथिको राजमार्ग पूर्णरुपमा अवरुद्ध हुन पुगेको सिन्धुपाल्चोकका प्रमुख जिल्ला अधिकारी गोकर्णमणि दुवाडीले जानकारी दिए ।
बाढीले राजमार्ग छेउका पक्की घरहरु समेत भत्काइदिएको छ ।
बाढीपछि ५ दर्जन भन्दा बढीलाई सेनाले उद्धार गरी काठमाडौं तर्फ पठाइएको जिल्ला प्रशासन कार्यालय सिन्धुपाल्चोकले जनाएको छ ।
बाढीले कोशी छेउ रोकिएका ट्रिपरहरु समेत बगाएको थियो भने एउटा झोलुंगे पुल र बेलिब्रीज समेत बगाएको थियो भने माथिल्लो भोटेकोशीको ड्याममा समेत क्षति पुगेको छ ।
यति ठूलो क्षति भए पनिमा मानवीय क्षति भने नभएको जिल्ला प्रशासन कार्यालय सिन्धुपाल्चोकले जनाएको छ ।
