काठमाडौं । क्रान्तिकारी कम्युनिस्ट पार्टी, नेपालका प्रवक्ता कञ्चनले एक प्रेस वक्तव्य जारी गर्दै इजरायल र प्यालेस्ताइनबीचको द्वन्द्वमा परी ज्यान गुमाएका नेपाली विद्यार्थीहरुप्रति हार्दिक श्रद्धाञ्जली व्यक्त गरेको छ । वक्तव्यमा घाइतेहरुको शीघ्र स्वास्थ्य लाभको कामना गर्दै इजरायलमा अध्ययनरत नेपाली विद्यार्थीहरु, श्रमजीवी कामदारहरु तथा पर्यटकहरुलाई सुरक्षित स्थानमा सार्न र देशमा फर्कन चाहने नेपालीहरुलाई तुरुन्त देशमा फर्काउने व्यवस्था मिलाउन नेपाल सरकारसँग जोडदार माग गरिएको छ ।
वक्तव्यमा विदेशी भूमिमा नागरिकहरुको हताहति हुँदा पनि नेपालको दुतावास बेखबर हुनु, सरकारसँग समन्वय गरेको औपचारिकता मात्र देखिनु तर व्यवहारमा क्रियाशील हुन नसक्नुलाई सरकार र यसका निकायहरुको लाचारीपनको संज्ञा दिंदै यसप्रकारको लाचारी र ढिलासुस्तीको तीव्र विरोध गरिएको छ ।
वक्तव्यमा इजरायली सत्ताबाट प्यालेस्ताइनी जनतामाथि थोपरिएको अत्याचारप्रति आँखा चिम्लिएर अमेरिकी साम्राज्यवादको गोटी इजरायली सरकारको पक्षमा वक्तव्यवाजी गर्ने दाहाल सरकारको साम्राज्यवादप्रतिको दलाली लज्जास्पद परिघटना भएको भन्दै यसको भत्र्सना समेत गरिएको छ ।
वक्तव्यमा भनिएको छ, “अमेरिकी साम्राज्यवादको सैनिक बुर्जाको रुपमा रहेको इजरायली सरकारले इजरायलको स्थापना कालदेखि नै प्यालेस्तिनी जनतामाथि कत्लेआम गर्दै आएको छ र प्यालेस्ताइनलाई नै दुई टुक्रामा विभाजित गरिदिएको छ । यस प्रकारको मानवता विरोधी साम्राज्यवादी नीतिको अन्त्य हुनु पर्छ । प्यालेस्तिनी जनताले आफ्नो भूमिको भौगोलिक अखण्डता र सार्वभौमिकताको रक्षा गर्न पाउनु उनीहरुको नैसर्गिक अधिकार हो । सैन्य शक्ति, सम्पत्ति र प्रविधिको बलमा जनतामाथि हिंसा थोपर्नु, राज्यनै विस्थापित गरिदिनु इजरायली सरकारको सत्ता संरक्षित आतंकवाद हो । हाम्रो पार्टी यसको घोर निन्दा तथा भत्र्सना गर्दछ । साथै हामी कब्जा गरेको प्यालेस्तिनी भूमि फिर्ता गर्न र देशभक्त नेताहरुको रिहाइ गर्न इजरायल सरकारसँग जोडदार माग गर्दछौं ।”
