बर्दिबास, महोत्तरी । अखिल नेपाल क्रान्तिकारी ट्रेड युनियन महासंघ महोत्तरीको प्रथम जिल्ला भेला प्रेम भुजेलको संयोजकत्वमा ११ सदस्यीय कमिटी गठन गर्दै बर्दिबासमा सम्पन्न भएको छ । भेलाले श्रमिकवर्ग विरुद्ध वर्तमान राज्य व्यवस्था र सरकारले शोषण, दमन र अत्याचारको बर्बर राजनीति गरेको निष्कर्ष निकाल्दै त्यसप्रकारको राजनीतिका विरुद्ध श्रमिकहरुको पेशागत हक, अधिकार र राजनीतिक व्यवस्थाको पक्षमा संघर्ष गर्ने घोषणा गरेको छ ।
‘मजदुरहरु माथि पुँजिपतिवर्गले चौतर्फी शोषण गरेको छ, अहिले उनीहरु माथि मिटरब्याज, लघु बित्त र बैंकको लूट चलिरहेको छ, तिनीहरु एकप्रकारले मजदुरहरुको रगत चुसिरहेका छन, यो प्रशासन, न्यायलय, सरकारले तिनै मजदुरविरोधीको पक्ष लिएको छ ।’ भन्दै भेलाका प्रमुख अतिथि एवं महासंघका महासचिव बसन्त बोगटीले अब मजदुरहरुले केवल रोटी र रोजगारीका निम्ति नभएर मजदुरवर्गको राजनीतिक व्यवस्था स्थापनाका निम्ति संघर्ष गर्नुपर्ने स्पष्ट गर्नुभयो । ‘अब मजदुरहरुलाई मुक्ति चाहिन्छ, आजादि चाहिन्छ । केवल काम, आराम, मनोरञ्जन होइन, मजदुरवर्ग अधिनस्थ राजनीतिक व्यवस्था चाहिन्छ । त्यसका निम्ति यो राज्य व्यवस्था बदल्नु पर्छ । नयाँ जनवादी, वैज्ञानिक समाजवादी राज्य व्यवस्था स्थापना गर्नुपर्छ ।’ ‘अब त्यसको निम्ति संघर्ष गरौं ।’
यसैगरी भेलालाई नन्दु झा, आलोक लगायतका नेताहरूले सम्बोधन गर्नुभएको थियो । महासंघको राष्ट्रिय भेला फागुन २०,२१ र २२ गते विराटनगर, मोरङमा हुँदै छ ।
