भाद्र १८ वर्दघाट नवलपरासी,
नेकपा (क्रान्तिकारी माओवादी) वर्दघाट नगर समितिद्धारा बर्दघाट–२ ढेडारीफाँटीस्थित जनताले संरक्षण गर्दै आएको ८ विघा १२ कठ्ठा २ धुर जग्गा भूमाफिया दलालहरुका विरुद्ध जनताको पक्षमा कब्जा गरिएको जानकारी वर्दघाट नगर समिति सेक्रेटरी क. क्रान्तिले प्रेस विज्ञप्तिमार्फत दिएका छन् । प्रेस विज्ञप्तिको पूर्णपाठ तल दिइएकोछ ।
प्रेस विज्ञप्ति
हाम्रो गौरवशाली पार्टी नेकपा (क्रान्तिकारी माओवादी) वर्दघाट नगर समिति पश्चिम नवलपरासीले राष्ट्रियता जनतन्त्र र जनजीवीकाको पक्षमा महंगी भ्रष्टचारी तथा कमिशनखोरी लगायत विभिन्न विकृति तथा विसंगती विरुद्ध संघर्ष गर्दै आएकोछ । वर्तमान अवस्थामा देशमा राजनीतिक रुपले दलाल पुँजीवाद हावी हुंदै गएको कुरा यहाँहरु माझ राख्न चाहन्छौ । राष्ट्रनै संसदीय दलालहरुले नेतृत्व गरेको वेला भ्रष्टाचार, माफियाकरण र दलालीकरण बृद्धि हुँदै जानु कुनै अनौठो विषय रहेन । दालालीकरणको यो रफ्तार केन्द्रदेखि स्थानीयस्तरसम्म विस्तार भएकोछ । त्यस्तै जनतालाई कम्युनिस्ट शासन भनेर भ्रम दिइएकोछ । नामधारी कम्युनिस्टहरुले कम्युनिस्ट आदर्श र विचारलाई दिगभ्रमित बनाएका छन् । जुन कम्युनिस्ट आन्दोलन र राष्ट्रकै लागि दुर्भाग्यपूर्ण छ ।
यही सन्दर्भमा बर्दघाट–२ ढेडारीफाँटीस्थित जनताले संरक्षण गर्दै आएको ८ विघा १२ कठ्ठा २ धुर जग्गामा विगतदेखि नै भूमाफिया दलालहरुले गिद्दे नजर लगाउँदै आएका छन् । समाजसेवी बुद्धिजीवी तथा राजनिितक कर्मी विभिन्न आवरणमा रहेका ती संसदीय व्यवस्थाका मतियारहरुले रयाल चुहाएको यो बहुआयामिक जग्गाको संरक्षण गर्नु हामी सबै नगरवासीको दायित्व हो । जनताले दिएको यो दायित्वबाट हाम्रो पार्टी पछि हटन सक्दैन ।
अतः जनतको यो नासो जनताकै हुनुपर्छ भन्ने हाम्रो पार्टीको रहेको छ । यो जग्गालाई वडावासी जनताले जसरी संरक्षण गर्दै,आएका छन् त्यसप्रति हाम्रो सन्मान रहदै आएकोछ । त्यसैले यो जग्गालाई सार्वजनिक जग्गाको रुपमा संरक्षण गर्नु पर्दछ । कौडीको भाउमा बेच्नु हुँदैन । त्यसैले सार्वजनिक जग्गाको रक्षार्थ आजैको मितिबाट जग्गा कब्जा गरेको घोषणा गर्न चाहन्छौ । अन्त्यमा यस सार्वजनिक सम्पत्तिका विरुद्ध जाने विभिन्न आवरणका भूमाफिया दलालहरुलाई हाम्रो पार्र्टी कारवाही गर्न वाध्य हुने कुरा यसै विज्ञप्ति मार्फत चेतावनी दिन चाहन्छौ ।
क्रान्तिकारी अभिवादन सहीत
क. क्रान्ति
सेक्रेटरी
