न्यूज एजेन्सी । चीनसँगको भिडन्तमा यही सोमबार राती कर्नेलसहित आफ्ना २० सैनिक मारिएपछि भारतीय प्रधानमन्त्री तनावमा देखिएका छन् । भारत र चीनको सीमा क्षेत्र लद्दाखको गलवान घाँटीमा तनाव बढेपछि भारतीय प्रधानमन्त्री नरेन्द्र मोदीले सर्बदलीय बैठक बोलाएका छन् । प्रधानमन्त्रीको सचिवालयले सर्बदलीय बैठक जुन १९ (शुक्रबार) ५ बजेलाई बोलाएको छ ।
प्रमुख पार्टीका सभापति सो बैठकमा भिडियो कन्फेरेन्सबाट बैठकमा सहभगी हुने न्यूज एजेन्सीहरुले जनाएका छन् ।
भारत–चीनको सीमा क्षेत्रमा सोमबार राति भएको झडपमा २० भारतीय सेनाको ज्यान गएको थियो । चीनतर्फ हताहती भएको दावी गरिए पनि चीनले हताहतीबारे विवरण सार्वजनिक गरेको छैन ।
चीनको विदेश मन्त्रालयका प्रवक्ता झाओ लिजियानले गलवान घाटीमा भएको झडपमा चीन जिम्मेवार नरहेको बताएका छन् । घटना चीनको इलाकामा भएकाले यसमा चीन जिम्मेदार नरहेको उनले बताए ।
उनले भारतले भारतीय बोर्डर प्रोटोकल र चीनका कमाण्डर स्तरमा भएको सहमतिको उलंघन गरेको आरोप लगाएका छन् । चीनले सीमामा संघर्ष नचाहेको बताउदै दुवै देशबीच कुटनीतिक र सैनिक स्तरमा कुराकानी भइरहेको पनि बताएका छन् ।
चीनसँगको भिडन्तमा मारिएका २० जना सैनिकहरुमध्ये कर्णेल वि सन्तोष बाबु, हवलदार पटनी र जवान कुन्दन ओझाको घटनास्थलमै मृत्यु भएको बताइएको छ भने भिडन्तमा घाइते १७ सैनिकको पछि मृत्यु भएको जनाइएको छ ।
घटनापछि भारतीय प्रधानमन्त्री नरेन्द्र मोदीले भारतीय रक्षामन्त्री राजनाथ सिंह, विदेशमन्त्री एस जयशंकर र चीफ अफ डीफेन्स स्टाफ सहित सेनाध्यक्ष सहित उच्च सुरक्षा अधिकारीहरुसँग वैठक समेत गरेका छन् ।
यो घटनालाई भारत र चीनको विवादित सीमामा ४५ सालपछि पहिलोपटक यति ठूलो घटना घटेको बताइएको छ ।
