हार्दिक शुभकामना !

प्युठान जिल्लाको रम्दी भन्ने ठाउँमा २०१९ असार ३ गते जन्मिएका मित्रमणी आचार्य ०३७ सालमा पक्लिह्वा क्याम्पसको स्ववियु सभापति निर्वाचित भएका थिए । उनी पछि २०४१ सालमा रामपुर कृषि क्याम्पसमा पनि स्ववियु सभापति निर्वाचित भएका थिए ।
आचार्यलाई २०४२ साल वैशाख १८ गते चितवनको पर्साढाप भन्ने ठाउँमा तत्कालीन नेपाली कांग्रेस समर्थक गुण्डाहरुले खुकुरी, भाला प्रहार गरी क्रुरतापुर्वक हत्या गरिएको थियो । सोही दिनलाई मित्रमणी दिवसको रुपमा मनाउने गरिएको छ ।

आज वैशाख १८ गते मित्रमणि स्मृति दिवस हो । यसअवसरमा मित्रमणि आचार्यका एक जना मित्र भरत पोखरेलको चीठी उनकै फेसवुक वालमा पोष्ट रहेछ, त्यसलाई आजको दिन वैशाख १८ गते समसामयिक लागेर हार्दिक श्रद्धाञ्जलिसहीत प्रकाशित गर्ने जमर्को गरिएको छ । सहीद मित्रमणि आचार्यलाई लेखेको भरत पोखरेलको चीठी तल दिइएको छः

 
मित्र मित्रमणि !
 
विद्यार्थी राजनीतिमा धेरै आरोह–अवरोह मैले जस्तै धेरै विद्यार्थीहरूले देखेभोगेका छन् । विद्यार्र्थी छँदा विराटनगरमा मेरा सहपाठी फणिन्द्र तिमिल्सिना र विद्यार्र्थी संगठनमा रहँदा रामपुर कृषि क्याम्पसका मित्रमणि आचार्यको सहादतको अनुभूतिले मलाई मङ्सिर ९ गते र आजको दिनमा उद्देलित नगर्ने कुरै भएन । अखिल नेपाल राष्ट्रिय स्वतन्त्र विद्यार्थी यूनियनको आठौं राष्ट्रिय सम्मेलन गोरखपुरको अग्रवाल धर्मशालामा २०४० साल चैत्रको अन्तिम सातातिर सम्पन्न भएको थियो । म पछि त्यो सम्मेलनबाट केन्द्रीय अध्यक्ष देव गुरुङ निर्वाचित भएका थिए । त्यसबेलाका केही केन्द्रीय पदाधिकारीहरूमा रमण श्रेष्ठ, कृष्णबहादुर महरा, दीपक महत, मातृका यादव, लेखराज भट्ट, हिमालचन्द्र गौतम, भरत दाहाल, हरिभक्त कँडेल, यज्ञ घिमिरे, बिमला पन्त, ताराकान्त पाण्डेय, यदु गौतम, मित्रमणि आचार्य, शान्ता ढकाल आदि थिए । त्यही सम्मेलनले अखिल नेपाल राष्ट्रिय स्वतन्त्र विद्यार्थी यूनियनको अंग्रेजी नाम (All Nepal National Free Students” Union) लाई संशोधन गरी (All Nepal National Independent Students” Union) गरेको थियो ।

गोरा वर्णका अग्ला कदका मित्रमणि आचार्य अखिलको इतिहासमा एउटा समर्पित सदस्य थिए । उनमा जुझारुपन साथै हँस्यौलीपन पनि भरपूर थियो । गोरखपुरको प्लेटभात र पेटभातको बाजीमा हेटौंडाका रामकृष्ण श्रेष्ठ (भक्तबहादुर श्रेष्ठका भतिजा) लाई अठारवटा रोटीको दाँजोमा बीस रोटी बजाएर मित्रमणिले बाजी जितेको चर्चा सबै भेटमा हुन्थ्यो । मित्रमणिको २०४२ साल वैशाख १८ गते चितवनमा सहादत हुँदा म नुवाकोटको थान्सिङमा थिएँ । चितवन वीरेन्द्र क्याम्पसमा रहँदा मैले मित्रमणि मारिएको स्थल मेघौली, उनले अध्ययन गरेको रामपुर कृषि क्याम्पस, उनको सालिक राखिएको लमजुङ सुन्दर बजारको कृषि क्याम्पसमा दिएको श्रद्धाञ्जलि र मित्रमणिले हरेक भेटमा गरेको स्यालुटको संझना विर्सेको छैन । आज वैशाख १८ मित्रमणि स्मृति दिवस । हार्दिक श्रद्धाञ्जलि ।
भरत पोखरेल

प्रतिक्रिया

सम्बन्धित खवर