काठमाडौं, असार ३१ । जारी विश्वकप फुटबल २०१८को शनिबार राति भएको खेलमा इंग्ल्याण्डलाई २–० गोल अन्तरले हराउँदै बेल्जियम तेस्रो बनेको छ ।
सुरुवाती ४ मिनेटमैं थोमस मुनिरको गोलबाट अग्रता लिएको बेल्जियमले विश्वकप भरी प्रभावशाली प्रदर्शन गरेका इडेन हर्जाडले निर्धारित समयको खेल सकिन ७ मिमेन बाँकी रहँदा गरेको गोल नै बेल्जियमको लागि निर्णायक बन्यो र इंग्ल्याण्डविरुद्ध निर्धारित समयको खेल सकिदाँ २–० को जित निकाल्न सफल भयो ।
विश्वकपमा बेल्जियमको यो सबैभन्दा उत्कृष्ट प्रदर्शन हो । तर, गोल्डेन जेनेरेसन भनिएको यो टोलीलाई उपाधिको दाबेदारका रूपमा हेरिएको थियो ।
क्वार्टरफाइनलमा बलियो ब्राजिललाई हराएपछि टोलीको आत्मविश्वास बलियो भएको थियो । सेमिफाइनफलमा फ्रान्ससँग आफ्नो नियमित खेल देखाउन सकेन र फाइनलमा पुग्नबाट चुक्यो ।
इग्ल्याण्ड पनि लयमै देखिएको थियो । युवा खेलाडीहरूको बाहुल्यता रहेको उसले पनि फाइनलको सपना देखेको थियो । तर, सेमिफाइनलमा क्रोएसियासँग स्तब्ध भएर उसले तेस्रो स्थानका लागि भएको खेल पनि हारेको छ । यसअघि पनि समुह चरणमा भएको भेटमा पनि बेल्जियमले नै बाजी मारेको थियो । विश्वकपको उपाधिका लागि आइतबार राति फ्रान्स र क्रोयसिया भिड्दै छन् ।
