बिराटनगर । विराटनगरमा अनधिकृत रुपमा रहेको भारतीय कन्सुलर कार्यालय हटाउन माग गर्दै तीन वाम घटकले आज अपरान्ह विरोध प्रदर्शनको तयारी गरेका छन् । नेकपा (क्रान्तिकारी माओवादी), नेकपा (माओवादी) र नेकपा (मसाल)ले संयुक्त रुपमा विरोध प्रदर्शन तथा सभाको आयोजना गर्दैछन् ।
प्राप्त जानकारी अनुसार क्रान्तिकारी माओवादीका बरिष्ठ नेता तथा देजमो, नेपाल अध्यक्ष सिपी गजुरेल, विप्लव माओवादीका प्रवक्ता खड्ग विश्वकर्मा र मसालका नेता हिमलाल पुरीले उक्त विरोधसभालाई सम्बोधन गर्दैछज् । विरोध प्रदर्शनलाई प्रभावकारी बनाउन क्रान्तिकारी माओवादी र विप्लव माओवादीका स्थानीय नेता कार्यकर्ताहरुले व्यापक तयारी गरिरहेका छन् ।
राष्ट्रियताको मुद्दामा कार्यगत एकता गरेर एक महिने संघर्षका कार्यक्रमसहित सडकमा उत्रिएका यी तीन वामघटले एक महिने संघर्षको अन्तिम कार्यक्रमको रुपमा आज कन्सुलर कार्यालय अगाडि विरोध प्रदर्शन गर्दैछन् । पौष १६ गते काठमाडौंमा एक अन्तक्र्रियाबाट सुरु भएको संयुक्त संघर्षको कार्यक्रमन्र्गत पौष २२ गते भारतीय कम्पनी जिएमआरसँग गरिएको माथिल्लो कर्णाली सम्झौताका विरुद्ध सुर्खेतमा र २५ पौषमा भारतीय कम्पनी सतलजसँग गरिएको अरुण तेस्रो सम्झौताका विरुद्ध संखुवासभाको खाँदबारीमा विरोध प्रदर्शन तथा सभाको आयोजना गरिएको थियो । तीनै वाम घटकका नेताहरुले माथिल्लो कर्णाली र अरुण तेस्रो जलविद्युत परियोजना नेपालीहरु आफ्नै लगानीमा गर्नुपर्ने धारणा राख्दै आएका छन् ।
