काठमाडौं । नेपालले श्रीलंकामा जारी एसीसी अण्डर नाइन्टिन एशिया कप क्रिकेट अन्तर्गत समूह ‘ए’ को आफ्नो दोस्रो खेलमा भारतलाई जितका लागि १७३ रनको चुनौती दिएको छ ।
टस जितेर पहिले ब्याटिङ रोजेको नेपालले निर्धारित ५० ओभरमा ९ विकेट गुमाएर १ को योगफल तयार पारेको हो । नेपालका लागि सातौं नम्बरमा ब्याटिङमा आएका ब्याट्सम्यान रोहित कुमार पौडेलले सर्बाधिक ६८ रन जोडे ।
४९ ओभरमा १४८ रन बनाउँदा नेपालले ९ विकेट गुमाएको थियो । अन्तिम ओभरमा ब्याटिङमा चामत्कारिक प्रदर्शन गर्दै पौडेलले ४९.२ ओभरमा छक्का प्रहार गरी अर्धशतक पूरा गरेका थिए ।
त्यसपछि भारतीय बलर कमलेश नगरकोटीबिरुद्ध आक्रामक देखिएका पौडेलले लगातार चार बलमा क्रमसः चौका, चौका, छक्का र चौका प्रहार गर्दै अन्तिम ५ बलमा २४ रन बटुले ।
यसअघि दिपेन्द्रसिंह ऐरीले ३४ रन बनाए । श्रीलंकाबिरुद्धको बिहीबारको खेलमा ९० रन बनाएका उनले भारतविरुद्ध ६२ बलको सामना गर्दै ४ चौका प्रहार गरे ।
सामान्य सुरुवात गरेको नेपालले ११ औं ओभरमा पहिलो विकेट गुमाएको थियो भने अठारौं ओभरसम्म पाँच विकेट गुमाउन पुग्यो । मध्य क्रममा दिपेन्द्रबाहेक अन्य कुनै ब्याट्सम्यानले राम्रो प्रदर्शन गर्न सकेनन् ।
ओपनर आसिफ शेखले १८ रन बनाए भने प्रकाश केसीले १३ र सन्दिप लामिछानेले ७ रन जोडे । तेस्रो र चौथो नम्बरमा ब्याटिङ गर्न आएका क्रमसः आदिल खान र भीम कार्कीले खाता खोल्न सकेनन् ।
नेपाललाई ८ देश सहभागी यस प्रतियोगिताको सेमिफाइनलमा पुग्नका लागि भारतविरुद्ध निश्चित जित चाहिएको छ ।
