काठमाडौं । अमेरिका र इजरायलले संयुक्त रुपमा इरानमा नरसंहार मच्चाएका छन् । एउटा स्वतन्त्र र सार्वभौम मुलुक इरानमाथि गरेको आक्रमणमा परी इरानका सर्वोच्च नेता, उनका छोरा–बुहारी र नातीसहित २०१ जना मारिएको पश्चिमी मिडियाले दावी गरेका छन् । तर इरानले भने सर्वोच्च नेता आयतोल्लाह अली खामेनी सुरक्षित रहेको बताएको छ ।
प्राप्त जानकारी अनुसार अमेरिका र इजरायलले दक्षिणी इरानको एक विद्यालयमा गरेको आक्रमणबाट कम्तीमा १०८ जनाको मृत्यु भएको स्थानीय सरकारी अधिकारीले बताएका छन् । इरानभर भएका हवाई आक्रमणमा भने कम्तीमा २०१ जनाको मृत्यु र ७४७ जना घाइते भएको तथ्यांक छ ।
राष्ट्रपति मोसुद पेजेस्कियानले विद्यालयमा भएको आक्रमणलाई ‘जंगली कार्य’ र ‘आक्रमणकारीहरूले गरेका असंख्य अपराधहरूको इतिहासमा अर्को कालो पाना’ भनेर टिप्पणी गरेका छन् ।
इजरायल र अमेरिकाबाट भने विद्यालयमा आक्रमण भएको विषय पुष्टि भएको छैन । उक्त विद्यालय इरानको इस्लामिक रिभोल्युशनरी गार्ड कोर (आईआरजीसी) को क्याम्पबाट करिब ६०० मिटर नजिकै पर्दछ । आईआरजीसी क्याम्प इजरायल र अमेरिकाको आक्रमणको निशाना बनेको थियो ।
एक अधिकारीका अनुसार होर्मोजगान प्रान्तको मिनाब सहरस्थित उक्त विद्यालयमाथि तीनवटा मिसाइल खसेका थिए । जेनेभामा रहेका रेडक्रस र रेड क्रिसेन्टका अधिकारीहरूले घटनापछि विद्यालयतर्फ उद्धार टोली परिचालन गरिएको बताएका छन् ।
बीबीसीले विस्फोटपछिको अवस्थासम्बन्धी केही भिडियो क्लिपहरू प्रमाणीकरण गरेको जनाएको छ, जसमा एक भवनबाट धुवाँ उडिरहेको, वरिपरि मानिसहरूको भीड लागेको र चिच्याइरहेको सुनिन्छ ।
तर मृतकको संख्या स्वतन्त्र रूपमा पुष्टि गर्न भने नसकेको बीबीसीले जनाएको छ । अन्तर्राष्ट्रिय सञ्चारमाध्यमहरूलाई प्रायस् इरानमा भिसा नदिइने भएकाले त्यहाँ तथ्य संकलन गर्न कठिन हुने गर्दछ ।
घटनापछि इरानी सामाजिक सञ्जाल प्रयोगकर्ताहरूले आक्रोश व्यक्त गरेका छन् ।
विदेशमा बस्ने र इरानमाथि सैनिक हस्तक्षेपको विरोध गर्ने एक इरानीले लेखेका छन्, ‘यस युद्धका पहिलो पीडित मिनाबका ४० बालिकाहरू हुन्, जो मिसाइल आक्रमणमा परे । के तपाईंहरूले समर्थन गरेको युद्ध यही हो ?’
‘जनतासँग आश्रयस्थल छैन, इन्टरनेट काटिएको छ, फोन सेवा बन्द छ र बालबालिकालाई विद्यालय नजान चेतावनीसमेत दिइएको छैन । यस्तो अवस्थामा घरमै बस्नुपर्थ्यो,’ उनले लेखेका छन् ।
यो विद्यालयको त्रासदी अमेरिका र इजरायलले शनिबारभर इरानका विभिन्न सहरमा लगातार हवाई आक्रमण गरिरहेका बेला भएको हो ।
अमेरिकी राष्ट्रपति डोनाल्ड ट्रम्पले प्रारम्भिक आक्रमणमै इरानका सर्वोच्च नेता अली खामेनी र उनका धेरै वरिष्ठ कमाण्डरहरू मारिएको दाबी गरेका छन् ।
खामेनीको निवासलाई लक्षित गरी गरिएको पहिलो चरणको आक्रमणपछि सार्वजनिक भएका भू–उपग्रह (स्याटेलाइट) तस्बिरहरूले उनको परिसरमा ठूलो क्षति भएको देखाएका छन्। आक्रमणको सुरुवाती समयमा इरानी अधिकारीहरूले उनलाई सुरक्षित स्थानमा लगिएको बताएका थिए। केही समयपछि उनले सरकारी टेलिभिजनमार्फत सम्बोधन गर्ने समाचार आए पनि अन्तिममा कुनै सम्बोधन हुन सकेन।
