अपिल
अन्तर्राष्ट्रिय मजदुर दिवस अर्थात मे १, सिकागो शहरका मजदुरहरुको कठोर संघर्ष र वलिदान मार्फत मजदुरहरुलाई आठ घन्टा काम, आठ घन्टा मनोरञ्जन र आठ घन्टा आरामको अधिकार दिन पुँजीपतिवर्ग बाध्य भएको ऐतिहासिक दिन हो । यो त्यस अघि अमेरिका र विश्वभर भएका सम्पुर्ण मजदुर विद्रोह वा क्रान्तिको विजयको दिन पनि हो । यसर्थ, यो विश्व सर्वहारा वर्गको निम्ति विजय र गौरवको दिन हो । सन १८८९ को दोस्रो अन्तर्राष्ट्रियको बैठकले यो दिनलाई अन्तर्राष्ट्रिय मजदुर दिवसको रुपमा मनाउने निर्णय गरेको थियो । हामी यस महान तथा ऐतिहासिक दिनको विशेष स्मरण एवं मार्गदर्शन बाट आलोकित हुँदै आजको मजदुर आन्दोलनको विकास, विजय र सर्वहारा वर्गको नेतृत्वमा नयाँ जनवादी राज्य–व्यवस्था स्थापनाका निम्ति संघर्षरत छौं । १३२ औं अन्तर्राष्ट्रिय मजदुर दिवस मनाउनुकोउद्देश्य उल्लेखित लक्ष्य सँग समर्पित छ ।
नेपाली श्रम बजारमा (औपचारिक र अनौपचारिक) झन्डै ६० लाख मजदुरहरु क्रियाशील रहेका छन । दलाल पुँजीपति वर्गले दैनिक उनीहरुको चर्को श्रम शोषण गर्दै आएको छ । दैनिक ८ देखि १८ घन्टा सम्म काम गर्ने मजदुरलाई हातमुख जोड्ने संकट छ । तोकिएको तलबको (प्रतिदिन रु.५१७, मासिक रु.१३४५०/) न्युनतम मापदण्ड पुरा गर्न समेत पुँजीपतिवर्ग तयार छैन । कोभिड–१९ को अवधिमा मात्रै औपचारिक श्रम बजारका १० लाख अधिक एवं अनौपचारिक बजारका लाखौं मजदुरहरु रोजगारीबाट निष्कासित भएका छन, लाखौंको रोजगारी संकटमा छ । श्रम बजारमा अस्थायी, करार, ज्यालादारी, हायर एन्ड फायर, नो वर्क; नो पे जस्ता श्रमिक विरोधी नीति लागु गरिएका छन । मजदुरहरुले पेशागत एवं राजनीतिक अधिकारको निम्ति संगठित हुन, संघर्ष गर्न पाउने अधिकार पनि दलाल पुँजीपति र ती समेतका मजदुर विरोधी संगठनको सहयोग मार्फत परिचालित अर्थवाद, ट्रेड युनियनवाद, वर्गीय तथा राष्ट्रिय आत्मसमर्पणवादका पक्षधर संसदवादी ट्रेड युनियनहरुको जालोले निल्दिएको छ । हाम्रो संगठन यो जालोलाई धुलोपिठो पार्दै मजदुरवर्गको पेशागत एवं राजनीतिक अधिकार सुनिश्चित भएको नयाँ जनवादी राज्य–व्यवस्था स्थापनाका निम्ति दृढ प्रतिबद्ध छ ।
आज नेपालको शासकले भारत, मलेसिया र मध्यपुर्वका देशहरुमा ५० औं लाख नेपाली मजदुरहरु निर्यात गरेको छ । कोभिड पुर्व दैनिक जसो औसत १३०० मजदुरहरु निर्यात हुँदै आएकोमा हाल यो संख्या दैनिक औसत ५०० को हाराहारीमा छ । पछिल्लो समय श्रम बजारमा मात्रै नभएर मध्य पुर्वका देशहरुमा यौनजन्य कामका निम्ति पनि कयौं नेपाली युवायुवती बेचिन थालेका छन । यसको निम्ति मानव तस्करहरुको अन्तर्राष्ट्रिय जालो सक्रिय छ । यसले मजदुर आन्दोलनको विकासमा अवरोध मात्रै न कि, हाम्रो राष्ट्रको वर्तमान एवं उज्ज्वल भविष्य निर्माणका निम्ति चुनौतीको पहाड खडा गरेको छ । हाम्रो संगठन चुनौतीको यस पहाडलाई ध्वस्त गर्दै नेपाली मजदुरहरुको श्रम, सीप र पौरख नेपाली धर्तिमा फक्रने र फुल्ने युगको निर्माण गर्न चाहन्छ ।
आज राष्ट्रको सम्पुर्ण पुँजी मुट्ठीभर सामन्त र दलालहरुको नियन्त्रणमा पुगेको छ । राष्ट्रका सारा बैंक र कतिपय विदेशी बैंकहरु समेत दलाल पुँजीपतिवर्गका कालोधनले भरिएका छन । संसदवादी राजनीतिक पार्टी, नेतृत्व र तिनका भातृ संगठनहरु भित्र दलाल पुँजीवादी र अर्थवादीहरुको बोलबाला छ । राज्यका सम्पुर्ण अङ्गहरु उनीहरुको नियन्त्रणमा छन । राज्यका आर्थिक, राजनीतिक र सामाजिक संकटहरु उत्कर्षमा छन । मजदुर, किसान र उत्पीडित जनसमुदायलाई विभिन्न भ्रमपुर्ण र सुधारवादी नाराको प्रचार गर्नु बाहेक विद्यमान राज्यसत्ता, व्यवस्था र सरकार पुर्णत: असफल भएको छ ।
यसर्थ, क्रान्ति आजको निर्विकल्प विकल्प हो । मजदुरवर्गको वास्तविक मुक्ति वा विजय भनेको सारत: सामन्त एवं दलाल पुँजीपति वर्गको सुरक्षा किल्ला बनेर खडा भएको विद्यमान राज्य–व्यवस्थाको अन्त्य एवं नयाँ जनवादी राज्य–व्यवस्थाको स्थापना हो । यसका निम्ति सम्पुर्ण मजदुरहरु बिचमा राजनीतिक वैचारिक स्पष्टता सहितको विराट सांगठनिक एकता अनिवार्य छ । हाम्रो संगठन यो ऐतिहासिक प्रक्रियामा गोलबद्व हुन राष्ट्रका सम्पुर्ण मजदुरलाई विशेष आव्हान गर्दछ । १३२ औं अन्तर्राष्ट्रिय मजदुर दिवसलाई मजदुरवर्गको नयाँ इतिहास निर्माण गर्ने सशक्त आन्दोलनमा बदल्न अपिल गर्दछ । धन्यवाद!
क्रान्तिकारी अभिवादन सहित !
अखिल नेपाल क्रान्तिकारी ट्रेड युनियन महासंघ
