भाग्य

प्रकाशित मिति : २०७७ आश्विन २४

- मित्रलाल पंज्ञानी

शक्तिका, पदका डाडु समातेका हजुर्हरू
खुसाए लाभ क्यै हुन्थ्यो, जम्मै बेकामका अरू
लर्को लाग्छ नमस्तेको, वाह ! भन्छ थुके पनि
तँ चुकिस् भन्न सक्तैन मोडैपिच्छे चुके पनि
उसैका स्वार्थमा बग्छन् साम्राज्यका दलाल यी
थोपो माया कतै छैन, निर्धो रेट्ने हलाल यी
निर्धा छौँ जनता हामी, किन ? कारण खोज्नु छ
निर्धाे रेट्ने खुनी सत्ता ढलाईकन छोड्नु छ
सिर्जनाको बगैँचामा श्रमले लेख्तछौँ सदा
निर्धाको दिन आएको सपना देख्तछौँ सदा
भाग्य रच्तै छ रे हाम्रो, क्वै भावीले कतै बसी
बस्तैनौँ यत्तिकै हामी चुप्प लागी कुना पसी
राम्रो लेख्यो भने लेख्यो, नलेखे पनि छैन क्यै
हाम्रो भाग्य स्वयम् लेख्छौँ, त्यसको च्यातिइन्छ त्यैँ