काठमाडौं । बिहीबार एकै दिन ६७१ जनामा कोरोना भाइरस (कोभिड–१९) संक्रमण पुष्टि भएसँगै संक्रमितको संख्या ७ हजार ८ सय ४८ पुगेको छ । स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमकाअनुसार बिहीबार देखिएका नयाँ संक्रमितमध्ये ५९१ पुरुष र ८० महिला रहेका छन् ।
बुधबार मात्रै ५८६ जनामा कोरोना संक्रमण पुष्टि भएको थियो । हरेक दिन संक्रमितको संख्या बढ्दै गएको छ । बिहीबारसम्म पीसीआर विधिबाट १ लाख ५५ हजार ५१८ र आरडीटी विधिबाट २ लाख ४३ हजार ७५ जनाको नमुना परीक्षण गरिएको मन्त्रालयले जनाएको छ ।
बिहीबारसम्म नेपालमा कोरोना भाइरस (कोभिड(१९) संक्रमणबाट मृत्यु हुनेको संख्या २२ पुगेको छ । मन्त्रालयका अनुसार बिहीबार थप दुई जनाको मृत्यु कोरोनाकै कारण भएको पुष्टि भएको छ ।
कैलालीको गोदावरी नगरपालिका–४ घर भएका ४६ वर्षीय पुरुषको बुधबार मृत्यु भएको थियो । सेती प्रादेशिक अस्पतालमा उपचारकै क्रममा उनको मृत्यु भएको हो । जेठ ३१ गते कोरोना संक्रमण पुष्टि भएका उनको बुधबार राति मृत्यु भएको थियो ।
त्यसैगरी कैलालीकै लम्कीचुहा नगरपालिका–२ की ४३ वर्षीया महिलाको समेत कोरोनाकै कारण मृत्यु भएको छ । जेठ ३१ गते टाउकोमा चोट लागेको र नेपालगञ्ज मेडिकल कलेज कोहलपुरमा भर्ना भएकी महिलाको सर्जरी गर्नु अघि पीसीआर परीक्षण गर्दा रिपोर्ट पोजिटिभ आएको थियो । उनको पनि बुधबार साँझ मृत्यु भएको थियो ।
काठमाडौं उपत्यकामा थप ६ जनामा कोरोना संक्रमण
स्वास्थ्य तथा जनसंख्या मन्त्रालयले दिएको जानकारी अनुसार काठमाडौंमा २ जना, ललितपुरमा १ र भक्तपुरमा ३ जना गरी थप ६ जनामा कोरोना संक्रमण देखिएको छ । काठमाडौंमा १ महिला र १ पुरुष र ललितपुरमा १ पुरुष र भक्तपुरका १ महिला र २ पुरुषमा संक्रमण देखिएको हो ।
पछिल्लो २४ घण्टामा पीसीआर विधिबाट ५ हजार ७४६ र आरडीटी विधिबाट ९ हजार ५३२जनाको नमुना परीक्षण गरिएको छ ।
मन्त्रालयका अनुसार १ लाख १६ हजार २१५ जना क्वारेन्टाइनमा छन् । यस्तै आइसोलेसनमा ६ हजार ६४८ जना रहेका छन् । ७४ जिल्लामा कोरोना संक्रमण फैलिसकेको छ । रेडजोनमा ५०३ रहेका छन् । यस्तै बिहीबार थप ४ जना रेडजोनमा परेका छन् ।
यस्तै बिहीबार थप १९ जना डिस्चार्ज भएका छन् । स्वास्थ्य तथा जनसंख्या मन्त्रालयका प्रवक्ता डा.जागेश्वर गौतमले गत २४ घन्टामा विभिन्न स्थानका आइसोलेसनबाट १९ जनाले कोरोना जितेर डिस्चार्ज भएको जानकारी दिए । योसहित निको हुनेको संख्या ११ सय ८६ पुगेको छ । डिस्चार्ज हुनेमा १ हजार ७२ पुरुष र ११४ महिला रहेका छन् ।
