‘टु प्लस वान’ भनेको नेपाललाई ‘डिक्टेट’ गर्ने होइन, एमसीसीबारे नेपालले स्वतन्त्र निर्णय लिनुपर्छ : चीन

प्रकाशित मिति : २०७६ पुस १८

१८ पुस, काठमाडौं । चीनले अमेरिकाको इन्डो प्यासिफिक रणनीति अन्तर्गतको मिलिनियम च्यालेन्ज कोअपरेसन (एमसीसी) बाट सहयोग लिने विषय दबाबमा नभई नेपालले स्वतन्त्र रुपमा निर्णय लिनुपर्ने धारणा सार्वजनिक गरेको छ ।
नेपालका लागि चिनिया राजदूत होउ यान्कीले आज (शुक्रबार) आयोजित पत्रकार सम्मेलनमा नेपालले आफ्नो आर्थिक उन्नतिका लागि कुनै पनि देशसँग सहयोग लिन सक्ने बताइन् । ‘नेपालले चीनसँग मात्र सहयोग लिनुपर्छ भन्ने छैन,’ राजदूतले भनिन्, ‘कसैको दबावमा भन्दा आफ्नो हित हेरेर अन्तर्राष्ट्रिय समुदायको सहयोग स्वीकार गर्नुपर्छ ।’

पत्रकार सम्मेलनमा राजदुत होउले त्रिदेशीय सहकार्यको विषयमा टु प्लस वानको अवधारणाबारे पनि प्रष्ट पार्दै भनिन्, ‘टु प्लस वान भनेको चीन र भारतले नेपाललाई डिक्टेट गर्ने होइन । सबै देश समान हुन् । यो त्रिदेशीय सहकार्यको अवधारणा नै हो ।’ यसको उदाहरणका रुपमा उनले अफगानिस्तानको सुरक्षा बललाई चीन र भारतले संयुक्तरुपमा तालिम दिइरहेको बताइन् ।

असोजमा चिनियाँ राष्ट्रपति सी जिनपिङको भ्रमणका क्रममा चीनले त्रिदेशीय सहकार्यका लागि टु प्लस वानको अवधारणा अघि सारेको थियो ।
हालै नेपालमा पक्राउ परेका चिनीया नागरिकहरुको विषयमा पनि उनले भनिन्, ‘पर्यटक भिसामा नेपाल आएर गैरपर्यटकको काम गरेकाहरुलाई नेपाल प्रहरीले समातेको हो । पक्राउ परेकाहरु अहिले हिरासतमै छन् ।’