देशैभर सहिद तथा वेपत्ता योद्धा परिवार र घाइते योद्धा सम्मानित (फोटो फिचार)

प्रकाशित मिति : २०७४ फाल्गुन २१

काठमाडौं । मोहन वैद्य‘किरण’ नेतृत्वको नेकपा (क्रान्तिकारी माओवादी) र नेत्रविक्रम चन्द‘विप्लव’ नेतृत्वको नेकपाद्वारा देशैभर दशवर्ष लामो महान जनयुद्धका सहिद तथा वेपत्ता योद्धा परिवार र घाइते योद्धाहरु सम्मानित भएका छन् । सहिद सप्ताहको अवसर पारेर यी दुवै पार्टीले कतै एकल त कतै संयुक्त रुपमा जनयुद्धमा आफ्नो अमूल्य जीवन गुमाउनु हुने सहिद, वेपत्ता योद्धा तथा घाइते योद्धाहरुलाई सम्मान गरेका हुन् ।

क्रान्तिकारी माओवादीले सहिद, वेपत्ता योद्धा परिवार र घाइते योद्धालाई देशैभर घर घर पुगेर सम्मान पत्र प्रदान गरेको छ भने संयुक्त रुपमा आयोजना गरिएका कार्यक्रमहरुमा सामुहिक रुपमा सम्मान गरिएको छ ।

क्रान्तिकारी माओवादीको ३ नं. प्रदेशका विभिन्न जिल्लामा जारी अभियानका बीच सहिद सप्ताहको अवसर पारेर सहिद, वेपत्ता योद्धा परिवार र घाइते योद्धाहरुलाई सम्मान गरिएको छ । प्राप्त समाचार अनुसार काठमाडौं उपत्यकामा २१ फागुनमा ललितपुरको कुपण्डोलस्थित सहिद बैकुण्ठ–चेत स्मृति भवनमा एक कार्यक्रमको आयोजना गरी सहिद, वेपत्ता योद्धा परिवार र घाइते योद्धाहरुलाई सम्मान गर्ने कार्यक्रम रहेको छ भने प्रदेशका १३ वटै जिल्लामा सहिद परिवार भेटघाट तथा सम्मान कार्यक्रम भइरहेको छ ।

चितवनमा नेकपा (क्रान्तिकारी माओवादी) र नेकपाको संयुक्त आयोजनामा सहिद परिवार अभिनन्दन तथा अन्तक्र्रिया कार्यक्रम सम्पन्न गरिएको छ । शनिबार सम्पन्न उक्त कार्यक्रमलाई क्रान्तिकारी माओवादीका महासचिव मोहन वैद्य‘किरण’, नेकपाका पिविएम रणवीर र सहिद परिवारका सदस्यहरुले सम्बोधन गर्नुभएको थियो ।

१४ फागुनमा क्रान्तिकारी माओवादी र नेकपाको संयुक्त आयोजनामा कोभ्रेको चौरी देउरालीमा सम्पन्न कार्यक्रममा प्रमुख अतिथि क्रान्तिकारी माओवादीका पिविएम तथा ३ नंं. प्रदेश पार्टी सचिव दिनेश शर्मा सागर लगायत अतिथिहरुले सहिद तथा वेपत्ता योद्धा परिवार र घाइते योद्धालाई दुवै पार्टीका तर्फबाट सम्मान पत्र प्रदान र दोसल्ला ओढाएर सम्मान गर्नुभएको थियो ।

रामेछापबाट प्राप्त समाचार अनुसार क्रान्तिकारी माओवादी र नेकपाको संयुक्त आयोजनामा रामेछाप नगरपालिकाको देउराली सेरा खोलामा देउराली हत्याकाण्डका ६ सहिदका परिवारहरुलाई सामुहिक रुपमा सम्मान गरिएको छ । क्रान्तिकारी माओवादीका केन्द्रीय सदस्य तथा जिल्ला इन्चार्ज गगनको प्रमुख आतिथ्यता र नेकपाका जिल्ला इन्चार्ज जमिनको विशेष आतिथ्यतामा सम्पन्न कार्यक्रममा सहिद परिवारका सदस्यहरुलाई सम्मान पत्र प्रदान र दोसल्ला ओढाएर अभिनन्दन गरिएको छ । १७ फागुनमा सम्पन्न उक्त कार्यक्रमको अध्यक्षता सहिद परिवार सदस्य गुञ्जनले गर्नुभएको थियो भने संचालन लांघाली मगरले गर्नुभएको थियो ।

त्यसैगरी मकवानपुर, सिन्धुली, दोलखा, नुवाकोट लगायतका जिल्लामा पनि सहिद परिवारहरुलाई सम्मान पत्र प्रदान गरिएको समाचार छ ।

उता विराटनगरबाट प्राप्त समाचार अनुसार मोरङ, सुनसरी, झापा, उदयपुर, ओखलढुंगा, तेह«थुम लगायतका जिल्लामा पनि सहिद परिवारलाई घर घरमै पुगेर सम्मान पत्र प्रदान गरिएको बुझिएको छ ।

त्यसैगरी पोखराबाट प्राप्त समाचार अनुसार कास्की, गोरखा, तनहुँ, नवलपुरलगायतका ४ नं. प्रदेशका जिल्लाहरुमा पनि सहिद परिवारलाई सम्मान पत्र प्रदान गरिएको छ । यता बुटबलबाट प्राप्त समाचार अनुसार सहिद परिवारलाई सम्मानका साथै रुपन्देहीका विभिन्न स्थानमा संगठनहरु निर्माण गरिएका छन् ।

दैलेखबाट प्रापत समाचार अनुसार कर्णाली प्रदेशका दैलेख र सुर्खेतमा सहिद परिवारको घरमै पुगरे सहिद परिवारलाई भेटघाट गर्दै सम्मान पत्र प्रदान गरिएको छ । पार्टी केस तथा दैलेख इन्चार्ज दीपक शाहीले दिएको जानकारी अनुसार दैलेखको आठविस नपा, ठाँटिकाँध गउँपालिका र चामुण्डा विन्द्रसौनि नपामा सहिद परिवारहरुलाई घर घरमै पुगेर सम्मान गरिएको छ । सहिद सप्ताहको अवसर पारेर जनयुद्धका महान सहिदहरु निरक व शाही भिषण, गणेश व शाही सर्जन, विष्णु आचार्य, दुर्गनाथ योगी, विमल थापा मगर, रंग व. विक, प्रेम व थापा, भिम बहादुर थापा विजय, नरेन्द्र बस्नेत विद्रोही, दिपक वहादुर शाही पुष्प, जगजं थापा, धिरेन्द्र विष्ट, पन्त रेग्मी सुजात, नविन शाही विद्रोही, उमा शाही, गगन वि क, जगत वि क, जसे वि क, दान व. विक, रंग रिजाल शक्तिलगायतका परिवारका सदस्यलाई सम्मान पत्र प्रदान गरी सम्मान गरिएको थियो ।

त्यसैगरी नवलपरासीबाट सहकर्मी रवि पाण्डेले पठाएको समाचार अनुसार २० फागुनमा क्रान्तिकारी माओवादी र नेकपाले संयुक्त रुपमा जिल्लाको बर्दघाटमा आयोजना गरेको कार्यक्रममा जिल्लाका ३४ जना सहिद परिवारलाई सामूहिक रुपमा सम्मान पत्र प्रदान र दोसल्ला ओढाएर सम्मान गरिएको छ ।

त्यस्तै दाङ, बाँके, बर्दिया, कैलाली, कंचनपुर, कपिलवस्तु लगायतका जिल्लाहरुमा पनि सहिद परिवारलाई सम्मान गरिएको समाचार प्राप्त भएको छ ।