रणनीतिक संयुक्त मोर्चाले बुटवलको ट्राफिक चोकमा आज वृहत् जनसभा गर्दै

प्रकाशित मिति : २०७७ फाल्गुन ६

बुटवल। मोहन वैद्य नेतृत्वको नेकपा (क्रान्तिकारी माओवादी), विप्लव नेतृत्वको नेकपा, ऋषि कट्टेल नेतृत्वको नेकपा र विश्वभक्त दुलाल ‘आहुती’ नेतृत्वको वैज्ञानिक समाजवादी कम्युनिस्ट पार्टी सम्मिलित रणनीतिक संयुक्त मोर्चाले बुटवलको ट्राफिक चोकमा आज वृहत् जनसभा गर्दैछ ।

प्रतिबन्धित विप्लव समूहसहित चार पार्टीबीच माघ २९ गते काठमाडौंमा रणनीतिक संयुक्त मोर्चा घोषणा भएको थियो ।

मोर्चाको पहिलो चरणको कार्यक्रम अन्तर्गत बुटवलमा गर्न लागिएको सभामा विप्लवसहितका चारै वटा पार्टीका शीर्ष नेताहरुले सम्बोधन गर्ने क्रान्तिकारी माओवादीका पोलिटब्युरो सदस्य प्रेम सुवेदीले जानकारी दिनुभयाे ।
सभालाई नेकपा (क्रान्तिकारी माओवादी)का स्थायी समिति सदस्य रामसिह श्रीस, नेकपाका ऋषि कट्टेल, वैज्ञानिक समाजवादी पार्टीका विश्वभक्त दुलाल आहुति, लेखक तथा बुद्धिजीवी शिशधर भण्डारी लगायतका नेताहरुले सम्बाेधन गर्ने कार्यक्रम रहेकाे छ

सभा हुनुअघि बुटवलको राजमार्ग चौराहाबाट र्‍याली निकालिने सुवेदीले बताए ।

गत पुस ५ गते प्रतिनिधिसभा विघटन गरिएपछि घोषणा भएको मोर्चाले संसद पुनःस्थापना वा निर्वाचन दुवैबाट निकास ननिस्कने भन्दै संसदीय व्यवस्थाको विकल्प खोज्नुपर्ने बताएको छ । र, विकल्पकाे रुपमा संघीय जनगणतन्त्र तथा वैज्ञानिक समाजवादी व्यवस्था अगाडि सारिएकाे छ ।

चार पार्टीको संयुक्त मोर्चा प्रदेश, जिल्ला हुँदै स्थानीय तहसम्म नै घोषणा गरिने बताइएको छ । संयुक्त संघर्षका लागि संयुक्त मोर्चा बनाएका चार पार्टीबीच पार्टी एकताको पहल भइरहेको क्रान्तिकारी माओवादीका महासचिव मोहन वैद्यले मार्चा घोषणा कार्यक्रममा बताउनु भएकाे थियाे ।