जाजरकोट जिल्लामा गरिएको नरसंहारवारे देशभक्त जनगणतान्त्रिक मोर्चा नेपालका अध्यक्ष सी.पी. गजुरेलको प्रेस वक्तव्य

जिम्मेवार सबैलाई कडा भन्दा कडा कारवाही गर्न सरकारसँग जोडदार माग । मृतकहरु प्रति श्रद्धाञ्जली र परिवारजनप्रति हार्दिक समवेदना प्रकट

प्रकाशित मिति : २०७७ जेष्ठ १५
जेठ १५ काठमान्डौ,
देशभक्त जनगणतान्त्रिक मोर्चा नेपालका अध्यक्ष सी.पी. गजुरेलले आज एक वक्तव्य प्रकाशित गरी जाजरकोट जिल्ला, भेरी नगरपालिका ४ रानागाउँ निवासी नवराज वि.क. र पश्चिम रुकुम जिल्ला चौरजहारी नगरपालिका १ सोतीकी लक्ष्मी मल्लका बीचको प्रेम सम्वन्धलाई विवाहमा परिणत गर्न मल्लको घर पुगेका १८ जनामाथि उनका परिवार, गाउँले र वडा अध्यक्ष सहितबाट भएको सांघातिक आक्रमणमा नीज नवराज वि.क., टिकाराम सुनार, गणेश बुढामगरको ज्यान गएको र अरु तीन जना भेरी नदीमा डुबेर बेपत्ता भएको समाचारप्रति घोर निन्दा र भत्र्सना गर्दै एक प्रेस वक्तव्य प्रकाशित गर्नु भएकोछ । प्रेस वक्तव्यको पूर्ण पाठ तल दिइएको छः
प्रेस वक्तव्य
यही २०७७ जेठ १० गते जाजरकोट जिल्ला, भेरी नगरपालिका ४ रानागाउँ निवासी नवराज वि.क. र पश्चिम रुकुम जिल्ला चौरजहारी नगरपालिका १ सोतीकी लक्ष्मी मल्लका बीचको प्रेम सम्वन्धलाई विवाहमा परिणत गर्न मल्लको घर पुगेका १८ जना माथि उनका परिवार, गाउँले र वडा अध्यक्ष सहितबाट भएको सांघातिक आक्रमणमा नीज नवराज वि.क., टिकाराम सुनार, गणेश बुढामगरको ज्यान गएको र अरु तीन जना भेरी नदीमा डुबेर बेपत्ता भएको समाचारले हामीलाई स्तव्ध बनाएको छ । जात नमिलेको कारणबाट घटाइएका जघन्य अपराधमा यस प्रकारका घटनाको हामी घोर निन्दा र भत्र्सना गर्दछौं । सामाजिक, मानवीय, न्यायीक, संवैधानिक कुनै पनि कोणबाट विचार गर्दा यो निन्दनीय र आपराधिक घटना भएको पुष्टि हुन्छ । यसका लागि जिम्मेवार सबैलाई कडा भन्दा कडा कारवाही गर्न हामी सरकारसँग जोडदार माग गर्दछौं । मृतकहरु प्रति श्रद्धाञ्जली अर्पण गर्दै परिवारजनप्रति हार्दिक समवेदना प्रकट गर्दछौं ।
सी.पी. गजुरेल
अध्यक्ष
देशभक्त जनगणतान्त्रिक मोर्चा नेपाल