काठमाडौं । संयुक्त लोकतान्त्रिक मधेसी मोर्चाले आह्वान गरेको तराई बन्दको दोस्रो दिन आज पनि तराई क्षेत्रको जनजीवन प्रभावित भएका छ ।
बन्दका कारण सप्तरी, सिरहा, धनुषा, महोत्तरी, बारा, पर्सा, सर्लाही, रौतहटलगायतका जिल्लाको जनजीवन प्रभावित बनेको हो । बन्दको प्रभाव पश्चिमी जिल्ला कपिलवस्तु, रुपन्देही र बर्दियामा पनि परेको छ ।
मोर्चाको बन्दका कारण यी जिल्लाको बजार, कलकारखाना, शैक्षिकसंस्था पूर्ण रुपमा ठप्प छन् भने यातायातका साधन संचालनमा आउन सकेका छैनन् ।
ती जिल्लामा बिहानैदेखि मोर्चाका कार्यकर्ता चोक चोकमा बसेर लाठीसहित प्रदर्शन गरिरहेका छन् ।
यसैबीच, सुनसरी प्रहरीले मंगलबार राति पूर्वबाट पश्चिम जाने ४ सय १० वटा गाडी र पश्चिमबाट पूर्वका लागि छुटेका ४ सय ८७ वटा गाडीलाई स्कर्टिङ गरी सुरक्षित स्थानमा पुर्याएको सुनसरी प्रहरी प्रमुख एसपी पोषराज पोख्रेलले जानकारी दिए ।
मोर्चाका कार्यकर्ताले सप्तरी घटनाको बिरोधमा बन्द आह्वान गरेका हुन् ।
उनीहरुले प्रहरीको गोली लागि मृत्यु भएकाहरुलाई शहीद घोषणा गर्नुपर्ने, मृतकका परिवारलाई उचित क्षतिपूर्ति दिनुपर्ने, दोषीलाई कारबाहीलगायत ६ बुंदे माग गरेका छन् ।
मोर्चाका कार्यकर्ताले एमालेको मेची–महाकाली अभियान कुनै पनि हालतमा सञ्चालन गर्न नदिने अडान राखेका छन् । मोर्चाका कार्यकर्ताको प्रदर्शनपछि तराईका जिल्लामा ठूलो संख्यामा सुरक्षाकर्मी परिचालन गरिएको छ ।
