एजेन्सी । भारतबाट उडेको इमिरेट्स एयरलाईन्सको विमान दुबई इन्टरनेशनल एयरपोर्टमा आकस्मिक अवतरणका क्रममा दुर्घटना भएको छ ।
भारतको त्रिवेन्द्रमबाट उडेको इ के ५२१ नम्बर उडानको बोइङ ७७७ विमान दुर्घटनाग्रस्त भएको हो ।
अवतरणका क्रममा विमानमा आगो लागेको भएपनि सबै यात्रुलाई सकुशल निकालिएको जनाइएको छ ।
इमिरेट्स एयरलाईन्सले ट्विटमार्फत दुर्घटनाको पुष्टि गरेको छ भने अल अरेबिया न्युज च्यानलले तस्बिर ट्विट गरेको थियो ।
ट्विटमार्फत एयरलाइन्सले त्रिवेन्द्रमबाट उडान भरेको इके ५२१ विमान दुर्घटना भएको र यसमा २७५ जना यात्रु रहेको जनाएको छ । दुर्घटनाका क्रममा सो विमान दुर्घटना भएपनि अन्य विमानलाई अवतरण गर्न केही समय रोक्नुपरेको थियो ।
विमानमा प्राविधिक समस्या देखिएपछि विमानस्थलमा यात्रुहरुलाई आकस्मिक रुपमा उद्धार गरिएको र सबै जना सकुशल रहेको संयुक्त अरब इमिरेट्स सरकारले जनाएको छ । विमानमा कति क्षति भएको भन्ने सम्वन्धमा भने केही बताइएको छैन ।
