लण्डन– युरोपियन युनियनलाई छाड्ने कि नछाड्ने भनी बेलायतमा लामो समयदेखि चलेको बहस शुक्रबार टुंगिएको छ । ईयूलाई छाड्ने कि नछाड्ने भनी विहीबार जनमत संग्रह गरिएको थियो ।
जनमत संग्रहबाट ईयू छाड्ने पक्षमा १ करोड ७४ लाख १० हजार ७ सय ४२ मत खस्यो भने ईयूसँगै रहने पक्षमा १ करोड ६१ लाख ४१ हजा २ सय ४१ मत खसेको छ । जनमत संग्रहबाट आएको यो नजितासँगै बेलायतले ईयूलाई छाडिदिएको छ ।
बेलायत यूरोपियन युनियन संघमा रहने नरहने फैसला गर्न भएको जनमत संग्रहमा ४ करोड ६४ लाख ९९ हजार ५ सय ३७ जनाले भाग लिएका थिए । विहीबार विहान सातबजेदेखि राती १० बजेसम्म मतदान भएको थियो ।
बेलायतको इतिहासमा योे तेस्रो पटक राष्ट्रिय जनमत संग्रह गरिएको हो । यो जनमत संग्रह भन्दा अघि बेलायत युरोपीय संघमा रहने वा अलग हुने मुद्दामा चार महिनासम्म अभियान चलाइएको थियो ।
सन् २००८ देखि बेलायत युरोपियन युनियनबाट बाहिरिनुपर्ने आवाज उठ्न थालेको थियो । सन् २००८ मा ग्रेट ब्रिटेनको अर्थव्यवस्था मन्दीको चपेटामा परेपछि बेरोजगारी बढेको थियो । त्यही आर्थिक मन्दीको कारण जनाउँदै ईयूलाई छाड्नुपर्ने मत बढ्दै गएको थियो ।
बेलायतले प्रत्येक वर्ष युरोपियन युनियनको बजेटका लागि ९ अर्ब डलर दिँदै आएको छ । ईयूबाट बाहिरिएपछि उक्त रकम दिनु नपरेपछि केही आर्थिक सुधार हुने बेलायतीको अपेक्षा छ ।
बेलायत र ईयू आवतजावतमा समेत छुट भएका कारण बेलायतले नोक्सान बेहोर्दै आएको छ । प्रधानमन्त्री डेभिड क्यामरन तथा कन्जरभेटिम पार्टी भने युरोपियन युनियनबाट बाहिरिन नहुने पक्षमा थिए । (एजेन्सीको सहयोगमा)
