लन्डन । च्याम्पियन्स ट्रफी क्रिकेटमा बंगलादेशले न्यूजिल्याण्डलाई ५ विकेटले पराजित गरेको छ ।

शुक्रबारराति भएको खेलमा टस जितेर पहिले ब्याटिङ गरेको न्यूजिल्याण्डले निर्धारित ५० ओभरमा ८ विकेट गुमाउँदै २ सय ६५ रनको योगफल बनाएको थियो । २ सय ६६ रनको लक्ष्य पाएको बंगलादेशले १६ बल बाँकी रहँदै जित हात पारेको हो ।

न्यूजिल्याण्डका लागि रोस टेलरले सर्वाधिक ६३ रनको योगदान गरे भने केन विलियम्सनले ५७, नेल ब्रुमले ३६, मार्टिन गुप्टिलले ३३ रन बनाए ।

बंगलादेशका लागि मोसाद्देक हुसैनले तीन, टस्किन अहमदले दुई तथा मुस्तफिजुर रहमान र रुबेल हुसैनले एक एक विकेट लिए ।

ब्याटिङतर्फ भने बंगलादेशको पारी सुरुमा धर्मराएको थियो । ३३ रन जोड्दा महत्वपूर्ण ४ विकेट गुमाइसकेको बंगलादेशका लागि मध्यक्रमका ब्याट्सम्यानले पारी सम्हाल्दै जित दिलाए ।

पाँचौं विकेटका लागि बंगलादेशका शकिब अल हसन र महमदुल्लाहले २२७ रनको साझेदारी गर्दै जित दिलाए । हसनले ११४ र महमदुल्लाहले १०२ रन बनाए । यी दुबैबीचको कीर्तिमानी साझेदारीले बंगलादेश विजयी भएको हो ।

पराजयसँगै न्यूजिल्यान्डको च्याम्पियन्स ट्रफी क्रिकेटबाट बाहिरिएको छ । उसको तीन खेलबाट १ अंक मात्रै रहेको छ ।