राष्ट्रिय समझदारी अपरिहार्य जूः प्रम प्रचण्ड

प्रकाशित मिति : २०७३ श्रावण २८

येँ (झीगु स्वनिगः) 
प्रधानमन्त्री पुष्पकमल दाहाल प्रचण्डं राष्ट्रिय विषयया नितिं राष्ट्रिय समझदारी अपरिहार्य जूगु धयादिल ।
थःत बधाई व भिंतुना बिइत प्रधानमन्त्रीया सरकारी निवास बालुवाटार थ्यंकूपिं नेपाल पत्रकार महासंघया पुचःलिसे खँ ल्हासें प्रम प्रचण्डं न्हूगु कानुन दयेकेत, भुखाय् लिपाया पुनःनिर्माणयात तीव्रता बिइत, संविधान कार्यान्वयन यायेत व संविधान संशोधन यायेत राष्ट्रिय सहमतिया आवश्यकता दूगुलिं बः बियादिल ।

 Prachanda-1

मुलुकया तःधंगु राजनीतिक ह्यूपाः दुने संचार क्षेत्रया भूमिका सकारात्मक व प्रगतिशील जूगु स्मरण यासें प्रधानमन्त्री प्रचण्डं धयादी, ‘राष्ट्रिय समझदारी निर्माणय् नं संचार क्षेत्रया भूमिका महत्वपूर्ण जू ।’

वय्कलं संविधानं आन्दोलनया उपलब्धि व जनताया महत्वपूर्ण मौलिक हकया व्यवस्था याःसां नं असन्तुष्ट खनेदूगु पक्षयात सम्बोधन यायेत आवश्यक जूगु विचाः प्वंकादिल ।

वय्कलं धयादी, ‘अझ नं युद्धया ईया मुद्दाया स्थिति छु जुइगु खः, थुगु सम्बन्धी दयेकूगु आयोगं गुकथं ज्या याइगु खः धैगु सवाल ब्वलनाच्वंगु दु । थ्व प्रक्रिया क्वचायेकेगु नितिं झीपिं युद्धपाखें वयापिं पक्ष अप्वः गम्भीर जुयागु दु ।’ शान्ति प्रक्रिया क्वचायेकेगु व संविधान कार्यान्वयन आःया मूलभूत विषय जूगु वय्कलं जानकारी बियादिल ।

थः सदां श्रमजीवी पत्रकारया पक्षय् दूगु स्पष्ट यासें नेकपा माओवादी केन्द्रया नायः प्रचण्डं थौं मंगलवाः हे सुथय् संचार क्षेत्रया लगानीकर्ताया पुचलं सरकारं आः नकनिति बृद्धि याःगु पत्रकारया न्यूनतम पारिश्रमिकं अतिकं मछिंगु पलाखय् लाकूगु खँ मार्मिक रुपं तःगु जानकारी बियादिल ।

लगानीकर्तां भुखाय् व नाकाबन्दीया हुनिं संचार क्षेत्रय् तःधंगु लिच्वः लाकूगुलिं बृद्धि जूगु पत्रकारया न्यूनतम पारिश्रमिकय् पुनःविचार यायेत प्रधानमन्त्रीयात आग्रह याःगु खः ।

नापलायेगु ज्याय् महासंघया नायः डा. महेन्द्र विष्टं मुलुकय् जूगु तःधंगु ह्यूपाःया कार्यभारयात संस्थागत यायेत संचार क्षेत्रं प्रभावकार िभूमिक निर्वाह याःगु लुमंकूसें आः नकतिनि जारी जूगु संचार नीति कार्यान्वयनया नितिं माःगु कानुनया परिमार्जन यायेत सरकारया पाखें ग्वाहालिया आशा यानादिल ।

वय्कलं पत्रकारया न्यूनतम पारिश्रमिक लागू यायेत सरकारं फयांफतले कुतः यायेमाःगु आग्रह यासें संचार क्षेत्रया समग्र विकासया नितिं श्रमजीवी पत्रकारया पेशागत व भौतिक सुरक्षा व संचार उद्योगया विकास निगुलिं दृष्टिकोणं स्वयेमाःगु धारणा तयादिल ।

नापलाये ज्याय् महासंघया महासचिव उजिर मगरं प्रधानमन्त्रीयात महासंघया पाखें बधाई व भिंतुना बिसें पत्रकारं भोगे यायेमाःगु हाथ्याया बारे नं ध्वाथुइकादीगु खः ।