माओवादी एकता छुकिया नितिं ? (२)

प्रकाशित मिति : २०७३ असार २८

- अमीर

अथ्यला विप्लवया माओवादीं नं न्हूगु जनवादी क्रान्तियात न्हूगूकथं न्ह्याकेगु धकाःहे नेकपा माओवादीपाखें व्यागलं च्वंगु खः । माओवादीयत्त एकीकृत यानाः सच्चा कम्युनिष्ट व क्रान्तिकारीतय्त गोलवन्द यानाः न्ह्याःवने माःगु इलय् अथ्य छाय् व छु कारणं वयकःपिं व्यागलं च्वंवनं धयागु न्ह्यसःया लिसः खुद विप्लवपिसं नं बीफूगु खनेमदु  । जनसत्ता स्वनाः समानान्तर सरकार स्वनाः न्ह्याः वनेगु धाःसां एकीकृत क्रान्तिया नां वियाः छुं न्हूगु खँ धाये त्यंगु धयागु खँ नं उलि स्पष्ट मदु ।
सच्चा क्रान्तिकारीतय्त छप्पँ छधी यानाः न्हूगु जनवादी क्रान्तिया तयारी यायेमाःगु इलय अथे व्यागलं च्वनाः याकः बुकः जूवंगुया ल्यूने छु ज्याखं ज्या याःगु खः धयागु खँ उलि खुलय याये मफुसां भविश्यय् सच्चा कम्युनिष्ट व क्रान्तिकारीतयगु दथ्वी छप्पँ छधी जुइगु धलखय् विप्लवया माओवादी नं छगू सम्भावित दलतय्गु दथ्वी छगू न्ह्यःने लाइगु समूह जुइफु ।

माओवादी पक्षतय्गु दथ्वी जुइमाःगु एकताया निगु ब्व दु, छगू खः क्रान्तिकारी माओवादीतयगु दथ्वीया एकता व मेगु खः एकीकृत माओवादी नापया एकता, थ्व निगुलिंयात छगू हे कथं थुइके मज्यू । सच्चा क्रान्तिकारी माओवादीत नापया एकता क्रान्तिकारी माओवादीतय्गु दथ्वी जक खः । एकीकृत माओवादी नापया एकता उगु पार्टीया नायः पुष्पकमल दाहाल प्रचण्डया परिवर्तन नाप स्वाः । अर्थात गुगु क्रान्तिया लँपु त्वःताः प्रतिकृयावादीतय्गु खेमाय् वनाः दं वनेगु ज्या यात उकियात सुधार वा संशोधन यानाः क्रान्तिया लँपुइ हयेगुनाप स्वाःगु खँ खः ।
थ्व निगू विषयलय् छलफल व वादविवाद ताःतक्क न्ह्यात । विषय निगू व अलग थलगया जूगुसां निगुलिं ईकथंया आवश्यकता व महत्वपूर्ण हे खः । अथ्य खयां नं माक्र्सवादयात मानय् याइपिं, क्रान्तिकारी कम्युनिष्टतयगु दथ्वी एकतावद्ध यानाः थातिइ लानाच्वंगु न्हूगु जनवादी क्रान्तियात न्हूगु हे स्फूर्तियात १० दँया अनुभवया आधाय् न्ह्याः वनेगु जरुरी खः ।

पार्टी एकता धयागु भावनाय् बगय् जुयाः गवलें नं जुइमखु । मालेमावादया निर्देशक सिद्धान्तकथं जनवादी केन्द्रीयताया संगठानात्मक सिद्धान्त व वर्ग संघर्षया बल प्रयोगया सिद्धान्तयात दुनें निसें स्वीकार यायेगु खः । उगु खँयात इलय् ब्यलय् एकतावादीतयया छलफल व विवादय् नं अक्षरशत स्वीकार यायेगु मौखीक रुपं प्रतिवद्धत्ता प्वंकेगु याःगु खः । तर व्यवहारय् छगू खँयात गवलें नं मौखिकरुपं प्रतिवद्धत्ता प्वंकुथें खनेमदु व नापनापं थःगु पार्टीया छुंनं वक्तव्य व इलयब्यलय पिहां वइगु प्रेस विज्ञप्ति आदिइ नं गनं, गवलें खनेमदु । अथ्य खयां नं एमाओवादी नाप पार्टी एकताया नितिं छलफल जुयां च्वन, वादविवाद यायेगु ज्या न्ह्यानां च्वन । मानौ पार्टी एकता याकनं जुइ, पार्टी एकता जुइगुपाखें अप्वःहे कार्यकर्तात व नेतात छगूकथं धुक्कँ च्वनेगु विश्वस्त वातावरण तयार जुजुं वन ।

थ्वहे दथ्वी एमाओवादीया नायः प्रचण्डं इलय ब्यलय् एकता याकनं जुइ, फलाना फलानाया न्हिइ  तिथिइ  निगू पार्टीया दथ्वी एकता जुइ धकाः न्हि तकं क्वछीगु ज्या जुल । एमाओवादीया थुगुकथंया अभिव्यक्ति पार्टी एकता नेकपा माओवादीयात स्वयाः एमाओवादीयात तसकं हत्थाय जुयाच्व्ांगुयात प्रस्त याइ । थुकिया कारण नं मेगु मखु, एमाओवादी न्हापांगु संविधानसभाया निर्वाचनं न्हापांगु थासय् वयाः दकले तःधंगु पार्टी जुइत ताःलागु पार्टी निक्वःगु संविधानया निर्वाचन लिपा स्वंगूगु थासय लाः वन । एमाओवादीया छुं नं खँ कार्यान्व्यन मजुयाच्वंगु अवस्थाय् पार्टी एकता यानाः एमाओवादीयात १ नम्वरय् थ्यंकेगु प्रचण्डया दाउ खःसा ल्यं राजनीतिक परिस्थितियात थःगुहे तालय् न्ह्याका यंकूगु खः ।

सुरु सुरुई पार्टी एकताया खँ ल्हानाः प्रचण्डं नेकपा माओवादीयात थःगु विश्वास् कायेत स्वःगु खः । क्रान्तिप्रति इमान्दार जुइगु, समाजवादीया नारा त्वःताः हानं न्हूगु जनवादी क्रान्तिया लँपुइ इमान्दारी पूर्वक लगय जुइगु, मालेमावादयात नालेगु, शक्ति प्रयोगया सिद्धान्तयात नालेगु, जनवादी केन्द्रियतायात नालेगु धकाः अनेक कथंया खँ ल्हानाः नेकपा माओवादयात धुक्क याका वःगु खः । तर दुनें दुनें धाःसा प्रचण्डया मेगुहे योजना खः । थुकियात नेकपा माओवादीं न्हापा थुइके मफुत व लिपा जूवले प्रचण्डं थःगु न्हापाया दक्को फुक्कं फाता पुइकाः धों लायेगु ज्या यानाविल । प्रचण्ड राजनीतिक धों लायेत खप्पिसम्ह मनू कथं न्ह्यःने वया विल ।
………कथहं

माओवादी एकता छुकिया निंति ?-भाग १

माओवादी एकता छुकिया निंति ?-भाग ३