माओवादी एकता छुकिया निंति ?-भाग १

प्रकाशित मिति : २०७३ असार २८

- अमीर

छगू इलय माओवादी एकताया नितिं छगू लहर हे न्ह्याःगु खः , थुकिया जःखः यक्को मू मू माओवादी दलत लानाच्वंगु खःसा केन्द्रय् लानाच्वंगु दल खः नेकपा माओवादी, हाल नेकपा क्रान्तिकारी माओवादी ।
माओवादी दलतयगु दथ्वी एकता यायेगु झ्वलय् थीथी दलतयगु दथ्वी न्यनावंथें माओवादीया नायः पुष्पकमलं दाहाल प्रचण्डनाप नं तक्वः छलफल व बार्ता जुल । बार्ताया झ्वलय माओवादी पाखें न्ह्यब्वःगु थीथी शर्त व मागप्रति नं एमाओवादीपाखें तक्वः हे प्रतिवेदननापं विचाः प्वंकेगु ज्या जुल । बार्ताया प्रकृया न्ह्यानाच्वंगु स्वये प्रचण्डं थःगु गन्तव्ययात हिलाः क्रान्तिप्रतिया लँपु त्वःताः न्हूगु जनवादी क्रान्तिया लँपुइ वइगु आसा याना हःगु खः । पटक पटकया छलफल व संवादं नं थुज्वःगु हे आभास वियावःगु खः ।

२०६९ असार महिनां नेकपा माओवादीं एकीकृत माओवादी नाप सम्वन्ध विच्छेद याःगु खः । थुयिकया कारण नं मेगु चिची धंगु विषय मजुसे न्हू माओवादी न्हूगु जनवाी क्रान्तिया अःखः वंगु व कम्युनिष्ट सिद्धान्त, सांगठनिक प्रकृया, जनवादी केन्द्रियता, शक्ति प्रयोगया सिद्धान्त फुक्क फुक्कं त्वःतेवं वाध्य जुयाः नेकपा माओवादीं एमाओवादी नाप सम्वन्ध विच्छेद यानाः व्यागलं नेकपा माओवादी गठन याःगु खः । उगु गठन लिपा सम्वन्ध विच्छेदयात औचित्यता सावित यायेगु पल्सा पार्टी उदारताया नीति नालाः प्रचण्ड लगायत मेमेगु माओवादीत नाप संघर्ष व भण्डाफोरया ज्याझ्वः यानाः न्ह्याःवनेगु पल्सा सहकार्यय् बह बीगु ज्या जुल । नेकपा माओवादी न्ह्याकूगु पार्टी एकताया विषयवस्तुयातेगु अवसर व मौका विल ।

पार्टी एकताया हे झ्वलय् एमाओवादीया नायः पुष्पकमल दाहाल प्रचण्डं स्वंगू बुंदे पत्र छ्वया हयेवं पार्टी दुने विवादं थाय् काल । उगु पौया लिसः छु गथ्य जुइमाः धयागु अनावश्यक विषयलं थाय् काल । पार्टीया नायः मोहन वैद्य किरणं पत्रया लिस कथं च्वःगु खँय् रामवहादुर थापा बादलं आपत्ति जक मखु फरक मतहे तयाः फुक्कसित अजू चायेकाविल ।
प्रचण्डया पत्रया विषयलय् केन्द्रीय समितिया बैंठकहे सःताः छलफल यायेगु धाल । पत्रया वारे नेतातय्सं खुल्ला बहसय ब्वति कयाः १२ न्हु हे फुकल । थुयाहे दथ्वी मूछ्याञ्जे रामवहादुर थापा बादलं न्हूगु जनवादी क्रान्तिया थासय् राष्ट्रिय जनवादया न्हूगु नारा न्ह्यःनेहल । १२ न्हुया लगातार बहसं खास प्रगति मजूसां मूछ्याञ्जे बादलं थः थःगु पक्षयापिं मनूत सःताः गोप्य बैठक तयाः वहुसंख्यक केन्द्रीय सदस्य तयत व्रेन वास यायेत ताःलात । थुगु ब्रेन वासय मुख्यत स्वता खं थाय् काःगु  व भूमिका म्हितूगु खनेदु ।

विश्वय गनं नं माओवादीतय्त संगठित याके मवीगुव, इमित स्वतन्त्ररुपं ज्या याकेमवीगुव संगठित व सशक्त संगठन वा पार्टी दत धाःसा उकियात साम दाम दण्ड भेदया माध्यमं कुचा कुचा यानाः छिन्न भिन्न यानावीगुनितिं विश्व न्यंक साम्राज्यवादीतय्गु माकःया जाः न्यकावयाच्वंगु दु । देश दुनेया दलाल नोकरशाही प्रतिकृयावादी दल व शक्तितय्त साम्राज्यवादी शक्तितनाप मिलय चलय जुयाः माओवादी कम्युनिष्टतयगु विरुद्ध सकृय दु ।
समाजवादी रुसय् व्रेझनेवया उदय् व चीनय् माओया देहवसान लिपा टेङस्याउ पिन्ङया उदय लगायत नं साम्राज्यवादीतयगुहे योजना व चलखेलया लिच्वः खः । मेमेगु देशतयगु दथ्वी नेपालय् नं माओवादी कम्युनिष्टतयगु संख्या कम मदु । छगू तथ्यांक कथंला कम्युनिष्ट विचाः ज्वनीपिंनिगु संख्या नेपाल् बहमत दु । थुपिं थौं कुचा काचा जुयाः न्ह्याक्कोय कुचाय विभाजित जुयाच्वंसां थुपिं दक्को छप्पं व छधी जुल धाःसा माओवादी कम्युनिष्टतयसं सोचय याःगु व निरन्तरता वियावयाच्वंगु न्हूगु जनवादी क्रान्तियात पूवंकाः समाजवादय् वनेफु । थ्व असम्भव मखु  । न्हूगु जनवादी क्रान्ति सम्भव दु धयागुया छगू दसिला नेपाःया माओवादीतयसं झिदँतक्क जनयुद्ध यानाः ८० प्रतिशत भूभाग कब्जा यानाः क्यने धुंकूग्ुा दु । क्रान्ति पूमवन व क्रान्तिया नेतृत्व याःम्ह पुष्पकमल दाहाल प्रचण्डं धोका विल । व क्रान्तियात १२ बुंदे सहमति वा सम्झौता यानाः जनसेनायात विघटन यानाविल । उकिं झिँदया जनयुद्धया अन्तय् साम्राज्यवादीतयगु ल्हातय् लाःवंम्ह प्रचण्ड धात्थेंला लाल गद्धार हे खः । वयात माफी गुगु हालतय नं स्वीकार्य जुइ मखु । तर क्रान्तिकारी माओवादी लगायत मेमेगु माओवादी दलतयसं नं वयकःया सही मूल्यांकन यायेगु यानाः लाल गद्दार प्रति कारवाही न्ह्याकेमाःगुली माओवादीत लिच्वः थौं खुद क्रान्तिकारी माओवादीं फयाच्वनेमाल  व थः मूछ्याञ्जे, छ्याञ्जे लगायत अधिकांस केन्द्रीय समितिया सदस्यत लाजिम्पाटय् वनाः गद्दारया तुति ज्वं जुल । थ्व दक्को थःपिनिगु उदारता व गदारप्रति कारवाहीं पलाः लिचिलेगुया हे लिच्वः वा परिणाम खः ।

पार्टी एकता थौंया अहम मुद्दा खः । सच्चा कम्युनिष्ट ह्याकूगु अभियान सही व महत्वपुर्ण खः । जनतायात संगठित यानाः न्हूगु जनवादी क्रान्तिया ल्यं कार्यभार पूवंकेगु आवश्यक खः । थुगु आवश्यकतायात नेकपा माओवादीं न्ह्याकूगुयात आम जनतां नं सकारात्मकरुपं काःगु जक मखु, व जनतां चाहेजूगु  नं थ्वहे खः । सक्षम व गतिशील नेतृत्व, सिद्धान्त व व्यवहारय् नापं क्रान्तियात आत्मसात याःगु पार्टी धयागु नेकपा माओवादी (हाल क्रान्तिकारी माओवादी) खः । क्रान्तिकारी माओवादीतय्त छप्पँ व छधी यानाः न्ह्याः वनेगु व न्हूगु जनवादी क्रान्तियात न्ह्यःने यंकेगु ज्या क्रान्तिकारी माओवादीं काःगु दु ।
………..कथहं

माओवादी एकता छुकिया निंति ?-भाग २

माओवादी एकता छुकिया निंति ?-भाग ३